हामी सबैकाे संसारन्यूज

खजुरको बोट हेर्छु
रेतको भरमा
न कसैको देखरेख
न त स्याहार सुसार
न त मलजल
न त गोडमेल
सुचारु रुपमा
ठिङ्गै उभिएको ।

न पानी माग्छ
न त घामको प्रचण्ड तापको
अघिनै झुक्छ
बडो साहसी
समयको अनुरागी
कर्तव्य छैन उसले भुलेको
अनेकौ कष्ट सहदै
शीत ताप सहदै
समयमा लटरम्म फल लागे पछि
न सोध्ने न खोज्ने
स्वार्थी हातहरु
फाइदाका भोगीहरु
एकाएक गर्दै
लुच्दै घोच्दै
सुसज्जित श्रृङ्गारिक रुप
पलभरमै
कुरुप बनाउन कसर गर्छन ।

हो ! समय यस्तै
सम्पुर्ण जगत
सम्पूर्ण आफ्नो हो भन्ने
मात्र स्वार्थको भावनामा
बाँचेका रहेछन्
जति सक्दो लुछ्नु थुत्नु
तर म डगमगाउने छैन
म पनि उही खजुरको बोट झै
आफ्नो कर्तव्य पालन गर्न
अनेकौं समस्या अघि
ठाडो ठिङ्गै उभिने छु
आफ्नो कर्तव्य पालन गर्नेछु
खजुरको बोट झै ।

हाल-संयुक्त अरब एमिरेट्स दुबई