हामी सबैकाे संसारन्यूज

हङकङमा पहिलो पटक एक नेपालीमा कोरोना भाइरसको संक्रमण भएको पुष्टि भएको छ ।

नेपालमा पोखरा स्थायी घर भएका २८ वर्षीय गुरुङ थरका ती युवाको मंगलबार गरिएको स्वास्थ्य परीक्षणका क्रममा कोरोना संक्रमण भएको पुष्टि भएको हो ।

आफ्ना सहकर्मीलाई कोरोना भाइरस संक्रमण भएपछि उनको समेत परिक्षण गरिएको थियो। परिक्षण रिपोर्ट पोजेटिभ आएपछि गुरुङलाई पनि कोरोना संक्रमण भएको पुष्टि भएको हो।

१० वर्षदेखि हङकङ बस्दै आएका ती युवा चार वर्षयता लान क्वाई फोङको बारमा काम गर्दै आएको थाहा भएको छ । उनको हङकङको सेङ सुइस्थित नर्थ डिष्ट्रिक अस्पतालको आइसीयूमा उपचार भइरहेको छ ।

गुरुङ आफ्ना बाबा, भाइबुहारीसँग हङकङमा नेपालीको एउटा मुख्य बसोबास स्थल युनलोङमा बस्दै आएका बुझिएको छ।

गैरआवासीय नेपाली संघ, हङकङका अध्यक्ष राधिका गुरुङ (टिका) ले पनि एक नेपाली युवामा कोरोना संक्रमण भएको पुष्टि गरिन् ।

उनले हङकङमा बसोबास गर्ने सबै नेपाली दाजुभाइ तथा दिदीबहिनीहरुलाई सतर्कता अपनाउन र सुरक्षित रहन आग्रह गरिन् ।