हामी सबैकाे संसारन्यूज

आज म पिँजराको सुगा भएको छु ।
ओएलाएको फूलको थुँगा भएको छु ।।

खोरभित्र थुनिएको बाख्रा र भेडा भएको छु ।
रस चुसेर फालेको लप्सीको गेडा भएको छु ।।

खोरभित्र थुनिएको सुँगुर भएको छु ।
काम नलाग्ने फोहरको डुंगुर भएको छु ।।

दाम्लोमा बाँधएको भैंसी, गोरू र गाइ भएको छु।
दुस्खको बेलामा सहयोग नगर्ने निष्ठुरी दाइ भएको छु ।।

खोरभित्र थुनिएको बाघ भएको छु ।
ओइलाएको साग भएको छु ।।

आफ्नै रफ्तारको समुन्द्रको छाल भएको छु ।
जुवाडेको जुवाखेल्ने जुवाको खाल भएको छु ।।

प्रयोग गरेर फ्याकिएको काम नलाग्ने माल भएको छु ।
काम नगरी बसी खाने नकचरो काल भएको छु ।।

कौरव र पाण्डवको जुवामा थापिएको चाँखे भएको छु ।
केही नजान्ने पटमुर्खजस्तो पाखे भएको छु ।।

परिस्थिति र समयको पाउबन्दीमा जकडिएको म ।
बिना कसुरको क्वारेन्टाइनमा बनाइएको बन्दी म ।।

आँखा नदेख्ने बेसहराको सारथि टेक्ने दण्डी म ।
बिना कसुरको जेलभित्र न्याय नपाएको बन्दी म ।।

घरभित्रै बन्दी बनाइएको बिना कसुरको बन्दी म ।।।