हामी सबैकाे संसारन्यूज

१४ बैशाख, अफ्रिका । अफ्रिकामा रहेका कोरोना प्रभावित नेपालीहरुको राहत सहयोगका लागि अफ्रिकी देशमा रहेका एनआरएनए एनसीसीहरु जुटेका छन् ।

अफ्रिकामा रहेका नेपालीहरुलाई पर्न सक्ने अप्ठ्यारोमा राहत सहयोग जुटाउन ‘एनआरएनए अफ्रिका राहत कोष’ को पहिलो अनलाइन बैठक शनिबार (२५ अप्रिल) मा बसेको हो ।

राहत कोषका संस्थापक संयोजक हिक्मत थापाको अध्यक्षतामा अफ्रीकाका विभिन्न देशहरुका एनआरएनएन अध्यक्ष र एनआरएनएका सक्रिय अभियन्ताहरुको सहभागीतामा सम्पन्न गरिएको अनलाइ बैठकले विभिन्न छलफल तथा निर्णय गरिएको बताइएको छ ।

एनआरएनए अफ्रीका राहत कोषका सदस्य सचिव रमेश कंडेलका अनुसार उक्त बैठकमा सबै एनसिसिका अध्यक्षहरु र एनसीसी नभएको देशबाट कोषका लागि कार्यरत एकजना बरिष्ठ पदेन सदस्य रहने गरी सर्ब सहमतिमा निम्न पदाधिकारी सहितको कोष संचालनका लागि समिती गठन गरिएको छ ।

एनआरएनएका पूर्व केन्द्रीय कोषाध्यक्ष हिक्मत थापाको संयोजकत्वमा गठन गरिएको उक्त समितिको सहसंयोजकमा रोशन थापा, सहसंयोजक बिदुर खनाल, सदस्य सचिव रमेश कंडेल र कोषाध्यक्षमा कुल कार्कीलाई चयन गरिएको छ भने आवस्यकता अनुसार संयोजकले दुई सदस्य थप गर्न सकिने निर्णय समेत गरिएको छ ।

त्यसैगरी बैठकले केन्याको वाक्र्ले बैंकमा रहेको पुरानै खातालाई एक्टिभ गरेर मौज्दात रकमलाई असर नपर्ने गरी तीनजनाको साइन चल्ने गरी पुरानै खातालाई निरन्तरता दिइने निर्णय गरिएको छ ।

त्यस्तै सम्पुर्ण प्रतिबद्ध रकम सम्बन्धित देशको एनसीसी अध्यक्षमार्फत् र एनसीसी नभएको देशमा जिम्मेवार ब्यक्तिमार्फत् जम्मा गरि एक मुष्ट खातामा ट्रान्सफर गरिने बताइएको छ । उक्त खाता नम्बर सबैलाई छिट्टै उपलब्ध गराइने छ ।

बैठकले आ–आफ्नो एनसीसीबाट सम्भावित संस्था वा ब्यत्तिहरुलाइ अपिल गरि यथासक्य राहत संकलन अभियान चलाउन समेत अनुरोध गरेको छ ।

कोषमा हालसम्म युएस डलर ११ हजार ६०० जम्मा भइ सकेको जानकारी दिँदै यसलाई वृद्धि गर्दै युएसडी २० सम्म पुर्याइने बताइएको छ ।

आइभोरी कोस्ट, नाइजेरिया, जाम्बिया र बोत्स्वानाका एनआरएनए पदाधिकारी र कोषका सदस्यहरु उपस्थित रहेको उक्त बैठकले अफ्रीका क्षेत्रमा रहेका एनआरएनबीच छिटो छरितो सम्पर्कका लागि व्हाट्सप ग्रुप तयार गर्ने निर्णय समेत गरेको जानकारी गराइएको छ ।