हामी सबैकाे संसारन्यूज

( १ )
सक्छौ भने चारैतिर ज्ञानको ज्योति बालेर देखाऊ
सुनलाई होइन फलामलाई आगोमा गालेर देखाऊ
किन समाजको अघि ठूला कुरा गर्दै हिड्न खोज्छौ
जन्म दिने बाआमालाई आफ्नै घरमा पालेर देखाऊ ।
( २ )

केटाकेटीहरू आफ्नै तालमा खेल्दा रहेछन् गिरहरू
उमेर बढ्दै जाँदा हरेक मान्छेको हुँदा रहेछन् पिरहरू
चाहे त्यो संसारकै शक्तिशाली शासक नै किन नहोस्
गल्ती हुँदा सबैको अगाडि झुकाउँदा रहेछन् शिरहरू
( ३ )
अहिलेको मान्छेलाई केही भन्नै हुन्न रिसाई हाल्छ्न
अन्नमा घुन देख्यो कि मिलमा लगी पिसाई हाल्छ्न
मान्छेमा लोभ लालचको पनि एउटा सीमा हुन्छ नि
व्यापारीले ढुङ्गाको टुक्रा देख्नै हुन्न मिसाई हाल्छ्न ।
( ४ )
आधी जीवन घाँसको भारीसँगै खोला तर्दा तर्दै बित्यो
गाउँघरमा पानीको ठूलो अभाव गाग्रो भर्दा भर्दै बित्यो
बेलैमा सुगमतिर बसाइँ सर्न जानिएन पश्चाताप लाग्छ
मुखियाको ठूलो हैकम के गर्नु चाकरी गर्दा गर्दै बित्यो
( ५ )
एउटाको कमाईमा अर्कै रमायो र म बेहाल भए
प्रेयसीमाथि कसैले हक जमायो र म बेहाल भए
यो संसारमा मरुँ कि बाँचु अन्योलमा परेको छु
निष्ठुरीले पराईको हात समायो र म बेहाल भए ।