१.
फल्नुस् निफन्नुस् यो ज्यानलाई हजुरकै काम आउँछ
पत्याउनुस् ! अधकल्चो बैँसमा न जून न घाम आउँछ
सुरक्षित राख्नुस् आफूलाई सधैं बलियो पटुकी कस्नुस्,
जोगिनु आफै फरिया लिएर अब!कृष्ण न त राम आउँछ ।
२.
कोही आउँछन् हाम्रो अस्तित्व गिजोलेर जान्छन्
हामीले देख्ने गरेको मिठो सपना बिथोलेर जान्छन्
सरकारले कुम्भकर्ण निद्राको अभिनय गर्न थालेपछि,
आउँछन् छिमेकी निर्धक्क बाटो छिचोलेर जान्छन् ।।
३.
यी आँखाको नानीभित्र तिमीलाई लुकाइ राख्थें
चुडिन्छ कि रुपको धागो कसि कसि मुटु बान्थें
तिमीलाई लाग्थ्यो चोट मलाई एैया एैया हुन्थ्यो,
उछिट्टियो कि मुटुभनि आफ्नो छाती आफै छाम्थे ।
४.
साँध–सिमानामा किचलो गर्ने दुष्ट सँधियारमा पर्छन्
सडक र सदनमा गर्जनेहरु तिनकै मतियारमा पर्छन्
अछुतो रहेनन् कोही सदन र सड्क तताउने दलहरू,
सत्तापक्ष न प्रतिपक्ष भ्रष्टाचारको अंशियारमा पर्छन् ।
५.
कस्तो लाग्यो प्यार तिम्लाइ आगो हो कि पानी
मनभरी माया दिउँ कि जलाइ मुटु दिउँ खरानी
यो दिलभित्र माया रोप्छु सत्य वचन बोलिदिन्छु
कर्कलाको शीत पो रैछ तिम्रो हाम्रो यो जवानी ।
वि.सं.२०७७ असार ६ शनिवार ०९:५४ मा प्रकाशित