हामी सबैकाे संसारन्यूज

३ मंसिर,काठमाडौँ । नेपाल कम्युनष्टि पार्टी(नेकपा)का स्थायी कमिटी सदस्य डा भिम रावलले गलत निर्णय गरेर देश र जनतालाई धोका र पार्टीप्रति गद्दारी हुने कुकर्ममा कोही नलाग्न आग्रह गरेका छन् ।

नेकपाभित्रको विवादले पार्टी गम्भिर संकटमा पुगेको बेला नेता डा रावलले सामाजिक सञ्जालमा समस्याको समाधान बैठकबाटै खोजिनु पर्ने धारणा राख्दै ‘फुट र विभाजन जस्तो देश र जनतालाई धोका र पार्टीप्रति गद्दारी हुने कुकर्ममा कोही नलाग्न’ आग्रह गरेका हुन् ।

सचिवालय बैठक बोलाउने सन्दर्भमा दुई अध्यक्षबीच गम्भिर टकराव भएको बेला उनले अहिलेको समस्याको समाधान सचिवालय बैठकबाटै खोज्नु पर्ने कुरामा जोड दिएका हुन् । उनले भनेका छन् ‘नेकपा एकीकरणको घोषणा, राजनीतिक प्रतिवेदन,केन्द्रीय कमिटी र कार्यदलको प्रतिवेदनमा आधारित स्थायी कमिटीको निर्णय, विधान र पद्धतिको पालना नै समस्याको समाधान हो ।’

नेकपा एकीकरणको घोषणा, राजनीतिक प्रतिवेदन,केन्द्रीय कमिटी र कार्यदलको प्रतिवेदनमा आधारित स्थायी कमिटीको निर्णय, विधान र पद्धतिको पालना नै समस्याको समाधान हो ।बैठकबाट समस्याको समाधान खोज्नुपर्छ।फुट र विभाजन जस्तो देश र जनतालाई धोका र पार्टीप्रति गद्दारी हुने कुकर्ममा कोही नलागौं।

— Bhim Rawal, PhD (@BhimRawal179) November 18, 2020

नेकपाका कार्यकारी अध्यक्ष पुष्पकमल दाहाल ‘प्रचण्ड’सहितका ५ जना सचिवालय नेताहरुले सचिवालयको बैठकलाई सुचारु गर्न आग्रह गरेका छन् । कार्तिक २८ गते बसेको सचिवालय बैठकमा कार्यकारी  अध्यक्ष प्रचण्डले अध्यक्ष केपी शर्मा ओलिको कार्यशैलीप्रति सवाल उठाउँदै १९ पृष्ठ लामो प्रतिवेदन बुझाएपछि बैठक स्थगित भएको थियो ।