Sansar News
२८ पुस, दाङ । नेकपा (एमाले) का सचिव योगेश भट्टराईले प्रमुख तीन राजनीतिक दल मिल्नाको विकल्प नभएको बताउनुभएको छ ।
तुलसीपुर उद्योग वाणिज्य सङ्घले तुलसीपुरमा आज आयोजना गरेको स्वागत तथा भेटघाट कार्यक्रममा एमाले प्रचार तथा प्रकाशन विभाग प्रमुख भट्टराईले नेपाली काँग्रेस, नेकपा (एमाले) र नेकपा(माओवादी केन्द्र) एक ठाउँमा उभिने हो भने मुलुकले समाधान पाउने विश्वास व्यक्त गर्नुभयो ।
“तीन शक्ति एक ठाउँमा आउनेबित्तिकै देश संविधान कार्यान्वयनको दिशामा अघि बढ्नाका साथै मधेसी मोर्चाका माग पनि पूरा हँुदै जाने छ र सहमतिमा आउन पनि पे्रसर हुने छ”– भट्टराईले भन्नुभयो । अर्काे प्रसङ्गमा उहाँले विप्रेषण अनुत्पादक क्षेत्रमा खर्च भएको जनाउँदै चिन्ता व्यक्त गर्नुभयो ।
सो अवसरमा उद्योग वाणिज्य सङ्घका अध्यक्ष विमल रिजालले विभिन्न माग समेटिएको सातबँुदे ज्ञापनपत्र नेता भट्टराईलाई बुझाउनुभएको थियो ।
ज्ञापनपत्रमा दाङमा रहेको एक मात्र टरिगाउँ विमानस्थलमा नियमित हवाई सेवा सञ्चालन, इन्धन डिपो स्थापना, बहुआयामिक सुविधासम्पन्न सभागृह निर्माण, स्थानीय निकायको अविलम्ब निर्वाचन , तुलसीपुर अमिलिया तथा तुलसीपुर रुकुम सडकको स्तर वृद्धिलगायत माग छन् ।
वि.सं.२०७३ पुस २८ बिहीवार १५:४२ मा प्रकाशित
