काठमाडौं । विश्वको सर्वौच्च शिखर सगरमाथाको उचाई ८६ सेन्टिमिटरले बढेको छ । जससँगै सगरमाथाको नयाँ उचाई ८ हजार ८ सय ४८ मिटर ८६ सेन्टिमिटर कायम भएको छ ।
मंगलबार नेपाल र चीनले संयुक्त रुपमा सगरमाथाको नयाँ उचाईबारे घोषणा गरेका हुन् ।
यसअघि सगरमाथाको उचाई ८ हजार ८ सय ४८ मिटर तय गरिएको थियो । जुन उचाई सन् १९५४ मा सर्वे अफ इन्डियाले नापेको थियो ।
सगरमाथाको उचाईबारे विवाद देखिएपछि सन् २०१० मा नेपाल र चीनबीच सोही उचाईलाई नै मान्यता दिने सहमती बनेको थियो ।
तर यसबीच विभिन्न देशले गरेको सगरमाथाको उचाई मापनमा फरक–फरक तथ्यांक आएको थियो । फरक–फरक तथ्यांक आएसँगै नेपाल आफैंले उचाई मापन गरेको हो ।
नेपाल सरकारले २०७४/०७५ को नीति तथा कार्यक्रममार्फत सगरमाथाको उचाई मापन गर्ने घोषणा गरेको थियो ।
जसपश्चात चिनियाँ राष्ट्रपति सी जिङपिङ नेपाल आउँदा चीन र नेपाल दुवैले आ–आफ्नै तरिकाले मापन गरेपनि घोषणा संयुक्त रुपमा गर्ने सहमती भएको थियो । जुन सहमतीअनुसार नै मंगलबार परराष्ट्रमन्त्री प्रदीप ज्ञवाली र चिनका स्टेट काउन्सिलर तथा विदेशमन्त्री वाङ यीले संयुक्त रुपमा सगरमाथाको नयाँ उचाई घोषणा गरेका हुन् ।
यसबीच विज्ञहरुले भूकम्पपछि सगरमाथाको उचाई घटेको अनुमान गर्दै आएका थिए ।
वि.सं.२०७७ मंसिर २३ मंगलवार १४:२८ मा प्रकाशित