२५ फागुन, काठमाडौं । कुवेतमा एक नेपाली महिलाको मृत्यु भएको छ । डिर्पोटेशनका माध्यमबाट घर फर्कनका लागि तयार भएकी ताप्लेजुङकी देवी माया लिम्बुको उपचारका क्रममा मृत्यु भएको छ ।
ताप्लेजुङको साँघु गाउँपालिका १ घर भइ धरानमा बसोबास गर्दै आएकी ४४ वर्षीया लिम्बु साढे २ वर्षदेखि कुवेतमा कामगर्दै आएकी थिइन् । उनकोे उपचारका क्रममा कुवेतस्थित फरवानिया अस्पतालमा आइतबार (मार्च ७) का दिन मृत्यु भएको उनका भाइ देव लिम्बुले संचारमाध्यमलाई जानकारी दिएका छन् ।
भारतको बाटो हुँदै कुवेत पुगेकी लिम्बु घरेलु कामदारका रुपमा कार्यरत रहेकी थिइन् । तर उनी बिचमा मालिकको घरबाट निस्किएर अवैधानिकरुपमा बाहिर बस्दै आएपछि दूताासबाट आवस्यक डकुमेन्ट बनाएर डिर्पोटेशन प्रक्रियाबाट घर फर्किन लागेकी थिइन् ।
उनको मृत्यु भएको सम्बन्धमा दूतावासमा प्रारम्भिक जानकारी आएपनि अन्य विवरण प्राप्त नभएको बताउँदै मृतकका परिवारसँग समन्वय गरेर शब स्वदेश पठाइने नेपाली दूतावास कुवेतका द्धितीय सचिव श्रीकृष्ण सिलवालले बताएका छन् ।
लिम्बु कुवेत पुगेको केही समयपछि उनका श्रीमानको पनि मृत्यु भएको छ भने लिम्बुका दुई छोरा र एक छोरी रहेको पनि भाइले जानकारी दिएका छन् ।
वि.सं.२०७७ फागुन २५ मंगलवार १२:१० मा प्रकाशित