फागुन २५, काठमाडौं । सर्वोच्च अदालतको फैसलासँगै ब्यूँतिएको नेकपा (माओवादी केन्द्र)को बैठक पेरिसडाँडामा सुरु भएको छ । पार्टी अध्यक्ष पुष्पकमल दाहाल ‘प्रचण्ड’का प्रेस सहयोगी सुर्य सापकोटा जुगलका अनुसार बैठक केहि बेर अघिदेखि सुरु भएको हो ।
आइतबार सर्वोच्चको फैसलाले नेकपा माओवादी केन्द्र र नेकपा एमालेलाई ब्यूँताईदिएको थियो । माओवादी केन्द्र ब्यूँतिइएपछि पार्टी अध्यक्ष पुष्पकमल दाहाल ‘प्रचण्ड’ले पहिलो पटक बैठक बोलाएका हुन् ।
आजको बैठकमा सर्वोच्चको फैसला र त्यससँगै सिर्जना भएको परिस्थितिबारे छलफल गर्ने कार्यसूची बनेको स्थायी समिति सदस्य हरिबोल गजुरेलले बताए । उनका अनुसार बैठकमा सरकार समिकरणबारे पनि छलफल हुनेछ ।
आजको बैठकमा प्रधानमन्त्री केपी शर्मा ओली पक्षमा गएका स्थायी समिति सदस्यहरुलाई बोलाए पनि सहभागी भएनन् । गृहमन्त्रीसमेत रहेका रामबहादुर थापा ‘बादल’, टोपबहादुर रायमाझी, लेखराज भट्ट र मणि थापा पार्टी एकतापूर्व माओवादी केन्द्रका स्थायी समिति सदस्य थिए । सरकारमा माओवादी केन्द्रको तर्फबाट सहभागी भएका उनीहरु विभाजनसँगै ओली पक्षमा देखिएका थिए ।
तर सर्वोच्चको फैसलासँगै साबिककै पार्टी ब्यूँतिए पछि पनि उनीहरु सहभागी नभएका हुन् ।
सम्बन्धित समाचार
वि.सं.२०७७ फागुन २५ मंगलवार १४:१५ मा प्रकाशित