फागुन २६, काठमाडौं । नेकपा (माओवादी केन्द्र)को प्रदेश १ का संसदीय दलका उपनेता टंक आङओबाहाङसहित केहि सांसद नेकपा एमालेमा प्रवेशको तयारी गरेका छन् । सर्वोच्चको फैसलासँगै नेकपा (एमाले) र नेकपा (माओवादी केन्द्र) पूर्ववत अवस्थामा फर्किएसँगै आङओबाहाङसहित केहि सांसद एमालेमा प्रवेशको तयारी गरेका हुन् ।
उनीहरुले एमालेको संघीय संसदका उपनेता सुवासचन्द्र नेम्वाङसँग पार्टी प्रवेशबारे अन्तिम छलफल पनि गरेका छन् । आङओबाहाङले संसार न्यूजलाई बताएअनुसार केहि दिनभित्रै पार्टी प्रवेश गर्ने गरि छलफल भएको छ । उनका अनुसार उनीसहित केही सांसद सामूहिक रुपमै एमालेमा प्रवेश गर्न लागेका छन् ।
माओवादी केन्द्रको नेतृत्वले एक पछि अर्को धोकाधडिपूर्णं गतिविधि गर्न थालेको भन्दै आफुँहरु एमालेमा प्रवेश गर्न लागेको उनले बताए । नेम्वाङसँग मंगलबार भएको छलफलमा उपनेता आङओबाहाङ र पूर्वसांसद पासाङ शेर्पा सहभागी थिए ।
नेता आङओबाहाङ जनयुद्धकालिन माओवादीका नेता हुन् । प्रचण्ड निकट मानिने आङओबाहाङको एमाले प्रवेशसँगै प्रदेश १ मा माओवादी केन्द्र थप कमजोर हुने सम्भावना छ ।
ओली पक्षमा गएका पूर्वमाओवादी नेता फर्किएका छैनन्
सर्वोच्च अदालतको फैसलासँगै नेकपा (एमाले) र नेकपा (माओवादी केन्द्र) पूर्ववत अवस्थामा फर्किँदा एमाले पक्षका सबै नेता पूर्ववत पार्टीमै फर्किए । तर, सामान्य अड्कल गरिएभन्दा भिन्न रुपमा प्रधानमन्त्री केपी शर्मा ओली पक्षमा गएका माओवादी नेताहरु भने पूर्ववत पार्टीमा फर्किएनन् । बरु विधिवत विभाजनसँगै माओवादी केन्द्र छाडेर एमाले प्रवेश गर्नेको लहर चल्न थालेको छ ।
आफ्नो पक्षमा आउनेलाई सम्मानजनक स्थान दिने तयारी प्रधानमन्त्री केपी शर्मा ओलीले गरेसँगै माओवादी केन्द्रमा भएकाहरु एमाले प्रवेश गर्न थालेका हुन् ।
हाल गृहमन्त्री रामबहादुर थापा ‘बादल’सहित उद्योगमन्त्री लेखराज भट्ट, उर्जामन्त्री टोपबहादुर रायमाझी, खानेपानीमन्त्री मणि थापा, श्रममन्त्री गौरीशंकर चौधरीलगायतका नेता माओवादी केन्द्र छाड्दै एमालेमै समाहित हुने निर्णयमा पुगेका छन् ।
वि.सं.२०७७ फागुन २६ बुधवार १३:३० मा प्रकाशित
