२१ बैशाख, दिल्ली । भारतमा तीन दिनयता कोरोना संक्रमित हुनेको संख्या घट्दै गएको छ ।
भारतमा सोमबार ३ लाख ५५ हजारमा कोरोना संक्रमण देखिएको छ । यो आइतबारको तुलनामा झण्डै १५ हजारले कमि हो ।
सोहि अवधिमा ३४३६ कोरोना संक्रमितले ज्यान गुमाएको त्यहाँको समाचार ऐजेन्सीले जनाएका छन् ।
त्यसैगरी निको हुनेको संख्या पनि उत्तिकै बढेको छ । सोमबार भारतभर ३ लाख १८ हजार जना कोरोना संक्रमणबाट मुक्त भएका छन् ।
भारतमा हालसम्म २ करोड २ लाख कोरोना संक्रमित भएका छन् । सोहि अवधिमा १ करोड ६६ लाख कोरोना संक्रमणबाट मुक्त भएका छन् ।
भारतमा हालसम्म २ लाख २२ हजार कोरोना संक्रमितको मृत्यु भएको छ भने हाल ३४ लाख ४३ हजार सक्रिय संक्रमितको उपचार भइरहेको छ ।
महाराष्ट्रमा पनि घट्यो संक्रमित हुनेको संख्या
त्यसैगरी भारतको सबैभन्दा बढी प्रभावित राज्य महाराष्ट्रमा सोमबार ४८ हजार ६२१ जना नयाँ कोरोना संक्रमित थपिएका छन् ।
सोहि अवधिमा ५९ हजार ५ सय जना कोरोना संक्रमणबाट मुक्त भएका छन् । साथै सोहि अवधिमा ५६७ जनाको निधन भएको छ ।
महाराष्ट्रमा आइतबारको तुलनामा सोमबार संक्रमित हुने र मृत्यु हुनेको संख्या घटेको छ । साथै सोहि अवधिमा संक्रमित हुने भन्दा निको हुनेको संख्या पनि बढी रहेको छ । महाराष्ट्रमा केही दिनयता संक्रमित हुने भन्दा निको हुनेको संख्या दैनिक बढिरहेको तथ्यांकले देखाएको छ ।
दिल्लीमा पनि घट्यो संक्रमितको संख्या
दिलीमा सोमबार १८ हजार ४३ जनामा कोरोनाा संक्रमण पुष्टि भएको छ । साथै सोहि अवधिमा ४४८ जनाको मृत्यु भएको छ । दिल्लीमा आइतबारको तुलनामा कोरोना संक्रमित हुनेको संख्या घटेपनि मृत्युदर बढेको तथ्यांकले देखाएको छ ।
दिल्लीमा आइतबार ४०७ जनाको मृत्यु भएकोमा सोमबार ४४८ जनाको मृत्यु भएको छ ।
दिल्लीमा सोमबार २० हजार २९३ जना निको भएका छन् । दिल्लीमा हालसम्म ११ लाख ९४ हजार कोरोनाको चपेटामा परिसकेका छन् भने ती मध्ये १० लाख ८५ हजार निको भइसकेका छन् । दिल्लीमा हाल ८९ हजार ५९२ सक्रिय संक्रमितको उपचार भइरहेको छ । साथै हालसम्म १७ हजार ४१४ संक्रमितले ज्यान गुमाएका छन् ।
भारतमा आइतबार ३ लाख ६९ हजार बढीमा कोरोना संक्रमण, ३४ सय बढीको मृत्यु
वि.सं.२०७८ वैशाख २१ मंगलवार १६:३३ मा प्रकाशित