हामी सबैकाे संसारन्यूज

२२ बैशाख, काठमाडौं । स्वास्थ्य तथा जनसंख्या मन्त्रालयले अब घरमै पुगेर सर्वसाधारणको पिसीआर परीक्षणको नमुना संकलन गर्नेले ५ सय रुपैयाँ मात्रै शुल्क लिन पाउने जानकारी दिएको छ ।

मन्त्रालयका प्रवक्ता डा.जागेश्वर गौतमका अनुसार मन्त्रालयको इन्सिडेण्ट कमाण्ड सिस्टमले गरेको निर्णय अनुसार घरमै पुगेर कोरोना परीक्षणको नमुना संकलन गर्नेलाई अधिकतम शुल्क पाँचसय रुपैयाँ दिनुपर्ने बताइएको छ ।

प्रवक्ता डा. गौतमका अनुसार अब व्यक्तिले सरकारी स्वास्थ्य संस्थाबाट नमुना परीक्षणका लागि घरमै जानेले १ हजार परीक्षण शुल्क र ५ सय नमुना संकलन शुल्क गरेर जम्मा १५ सय तथा नीजी स्वास्थ्य संस्थाले परीक्षण शुल्क २ हजार र नमुना संकलन शुल्क ५ सय गरेर जम्मा २५ सयमात्र लिनुपर्नेछ ।

यसका लागि राष्ट्रिय जनस्वास्थ्य प्रयोगशालाले आवस्यक मापदण्ड व्यवस्थापन गर्ने निर्णय समेत गरिएको छ ।

त्यस्तै स्थानीयतहरुलाई जोखिमयुक्त स्थानहरुमा कन्ट्रयाक ट्रेसिङ सघन रुपमा गरी नमुना संकलन गरेर कोरोनाको परीक्षण बढाउने व्यवस्था गर्न समेत मन्त्रालयले अनुरोध गरेको छ ।