हामी सबैकाे संसारन्यूज

२६ वैशाख, काठमाडौँ । सोमबार प्रधानमन्त्री केपी शर्मा ओलीले विश्वासको मत लिने भनिँदैछ । यो बीचमा राष्ट्रपति विद्यादेवी भण्डारीले एमाले भित्रको विवाद मिलाउन निकै पहल र प्रयास गरेको पनि सार्वजनिक भयो । एमाले भित्रका दोस्रो तहका नेताहरुले पनि विभिन्न विकल्पमा छलफल चलाएको विषयले पनि सो पार्टीभित्र एकताको सम्भावनाको अन्त भैनसकेको विश्लेषण गरियो । यहि बीचमा एमालेको झलनाथ खनाल–माधव नेपाल समूहले स्थायी समितिको बैठक आयोजना गरि प्रतिनिधिसभामा निर्वाचित सांसदहरुलाई राजीनामा दिन लगाउने निर्णय गरेको समाचार पनि बाहिरियो ।

यो समाचार बाहिरिएसँगै नेपाल पक्षका सांसदले राजीनामा दिने नदिने विषय प्रतिक्षाको घडिमै छ । शनिबार रातभरी अन्यथा नभए सो समूहले राजीनामा दिने कुरो पक्का जस्तै देखिएको थियो । नेपाली उखान रात रहे अग्राख पलाउँछ भने जस्तै प्रधानमन्त्री ओलीले विश्वासको मत लिने समय सम्म आफूले सबैलाई उपयोग गर्ने कुरा निकटस्थहरुसँग भन्दै आएका छन् । तथापि शनिबार बेलुका सम्म एमालेहरु बीचको एकता चाहेको ठूलो समूह आइतबार बिहान आइपुग्दा निरासामा देखिएको छ ।

एकातिर प्रतिनिधिसभा बैठकबाट प्रधानमन्त्रीले विश्वासको मत पाउने सम्भावना क्षिण हुँदै जानु र अर्कोतर्फ विपक्षी गठबन्धनको अंकगणित ग्राफमा बढ्नुले प्रधानमन्त्रीका समर्थकहरुलाई हतोत्साहि बनाउन थालेको छ ।

यति हुँदाहुँदै पनि राजनीतिमा जस्तोसुकै तिकड्म पनि अपनाउन पछि नपर्ने प्रधानमन्त्री ओलीको अभ्यास यसबीचमा नदोहोरिएलान् भन्न सकिन्न । उनले माधव समूहका विभिन्न नेताहरुलाई विभिन्न प्रलोभन दिने, राष्ट्रपतिलाई प्रयोग गरेर आफू अनुकूल वातावरण बनाउन प्रयास गर्ने र राज्यसत्ताको अधिकतम प्रयोग गरेर आफ्नो व्यक्तिवादी महत्वकांक्षा नथप्लान् पनि भन्न सकिन्न् ।

एमाले नेता घनश्याम भूसालले महशुस गरेजस्तो विगत १ वर्ष देखि प्रधानमन्त्री ओलीलाई वास्तवमा प्रतिनिधिसभा चाहिएको थिएन । प्रतिनिधिसभा चाहिएका माधव समूहले राजीनामा दिनु पर्ने स्थिति ल्याउन सक्ने ओलीले अबका बाँकी केही घण्टाहरुमा थप उपद्रो नगर्लान् भन्न त झनै सकिन्न ।

यदि माधव पक्षले सांसद पदबाट राजीनामा दिए प्रधानमन्त्री ओली स्वतः अल्पमतमा पर्ने नै छन् । माधव पक्षको सहमतिमा राष्ट्रिय सभामा सो समूहकै नेता खिमलाल देवकोटालाई उम्मेदवार बनाउनु र सबै विपक्षीको समर्थन जुटाउनुले माधव पक्ष पछाडी हट्न सक्ने स्थिति देखिँदैन । तथापी एमाले नाम गरेको पार्टी र सुर्य चिन्हमा भोट हाल्ने लत भएकाहरुको सुझाव र दबाबका आधारमा पुन एकताको प्रयास अन्तिमसम्म भैरहने देखिन्छ ।

माधव समूहका अनुसार लामो प्रयास र संवादपछि पनि पार्टी अध्यक्ष एवम प्रधानमन्त्री केपी शर्मा ओली सहमतिका लागि सकरात्मक नदेखिएपछि अन्ततः आफूहरुले राजीनामा दिने निष्कर्षमा पुगेको बताउँदै आएको छ । यतिबेला बालुवाटारबाट केपी ओलीले माधव समूहको घोषणालाई सामान्य धम्किको रुपमा लिन सक्ने स्थिति छैन नत माधव समूह ओलीको मिठा कुरामा चुकेर अर्को फन्को हानि हाल्ने स्थितिमा पनि देखिँदैन् ।

जसरी पूर्व एमालेहरुको बीचमा एकता चाहने पंक्ति देखिएको छ, त्यसैगरी बृहद् बाम एकताको कुरा पनि जबरनै उठेको छ । बृहद् बाम एकताको वातावरणका लागि प्रधानमन्त्री ओलीले प्रतिगमनकारी मानसिकता र व्यक्तिवादी अराजकताप्रति निशर्त आत्मालोचना गर्दै सर्वप्रथम पूर्व एमालेको अर्को कुनै व्यक्तित्वलाई प्रधानमन्त्रीको रुपमा प्रस्ताव गर्नु, पूर्व एमालेलाई २०७५ जेठ ३ गते अगाडीको स्थितिमा लैजानु, माओवादी केन्द्रसँगको एकतासँगै बृहद् नेकपाका लागि सैद्धान्तिक, बैचारिक र राजनैतिक आधारहरु निर्माण गर्नु कम्युनिष्ट आन्दोलनका लागि सुखद् अवसर हुन सक्छ । केपी ओलीले जे गर्दा पनि जिन्दाबाद भन्ने मानसिकता त्यागेर नयाँ आधारमा नयाँ एकताको खोजी गर्ने हो भने थप सम्भावनाहरु ज्यूँका त्युँ नै छन् ।

अहिले देश ओलीको आत्मालोचना र माधव समूहको रणनीतिको प्रतिक्षामा छ । तर ओली हठ परिमार्जन हुने लक्षण देखिएको छैन । त्यसैले पनि माधव समूहलाई आफ्नो समूहको वैचारिक अस्तित्वको प्रश्न छ । ओलीको प्रतिगमनका विरुद्धमा दह्रोसँग जुधेको यो समूहले अन्ततः प्रतिनिधिसभा भन्दा राजनीतिक निकासलाई नै रोज्ने अनुमान गरिएको छ ।