हामी सबैकाे संसारन्यूज

वैशाख २८, पोखरा । गण्डकी प्रदेशमा नेकपा (एमाले)कै सरकार बन्ने निश्चित देखिएको छ । अंकगणितमा निर्णायक मानिएको राष्ट्रिय जनमोर्चाका दुई सांसदले कांग्रेस नेतृत्वको गठबन्धनलाई समर्थन गर्न अस्वीकार गरेसँगै यस्तो देखिएको हो ।

राजमोका प्रदेश सांसद कृष्ण थापा र खिमविक्रम शाहीले गठबन्धनलाई समर्थन दिन अस्वीकार गरेका हुन् । मंगलबार राजमोका केन्द्रीय महासचिव मनोज भट्टसहितको टोलीले समेत आग्रह गर्दा दुवै जनाले कांग्रेस गठबन्धनलाई सहयोग गर्न अस्वीकार गरेका छन् । राष्ट्रिय जनमोर्चाले भने आधिकारिक रुपमा गठबन्धनलाई सहयोग गर्ने निर्णय गरेको थियो ।

६० सदस्यीय प्रदेशसभामा बहुमत पुर्याउन ३१ सांसदको समर्थन चाहिन्छ । गण्डकी प्रदेशसभामा एमालेको २७, कांग्रेसको १५, माओवादी केन्द्रका १२, जनमोर्चाको ३, जनता समाजवादी पार्टीको २ र स्वतन्त्र १ सांसद छन् । गठबन्धनले जनमोर्चाका तीनै सांसदको समर्थन बिना सरकार निर्माण गर्न सक्दैन् ।

आइतबार मुख्यमन्त्री पृथ्वीसुब्बा गुरुङ्गले राजीनामा दिएसँगै प्रदेश प्रमुख सीता कुमारी पौडेलले दुई वा दुईभन्दा धेरै दल मिलेर सरकार बनाउन बुधबारसम्मको समयसीमा दिएकी थिइन् । तर, अन्तिम समय नजिकिँदै गर्दा पनि गठबन्धनले बहुमत जुटाउन नसकेसँगै प्रदेशसभाको नेतृत्वमा पुनः एमाले दोहोरिने सम्भावना बढेको हो ।

संविधानको धारा १६८ को उपधारा ३ मा दुई वा दुईभन्दा धेरै दल मिलेर प्रदेश सरकार बनाउन नसकेमा उपधारा ३ बमोजिम ठूलो दलको नेतालाई प्रदेश प्रमुखले मुख्यमन्त्रीमा नियुक्त गर्ने प्रावधान छ ।

सम्बन्धित समाचार

गण्डकीका मुख्यमन्त्रीले दिए राजीनामा

३ दिन भित्र नयाँ सरकार निर्माण गर्न प्रदेश प्रमुख पौडेलको आह्वान