हामी सबैकाे संसारन्यूज

वैशाख ३०, काठमाडौं । नेकपा (एमाले)का अध्यक्ष केपी शर्मा ओली र नेता माधवकुमार नेपालबीच भेटवार्ता सुरु भएको छ । काठमाडौं बुढानिलकण्ठस्थित एक व्यवसायीको घरमा दुई नेताहरु वार्तामा जुटेका हुन् ।

माधव नेपाल पक्षका सांसदले ६ बुँदे माग अघि सार्दै सामूहिक राजीनामाको अल्टिमेटम दिएपछि दुई नेता वार्तामा जुटेका हुन् । यसअघि बिहिबार बिहान दुई नेताबीच फोन संवाद भएको थियो ।

फोन संवादपश्चात बसेको एमाले बैठकले माधव नेपालसहित उनी पक्षीय नेताहरुमाथि लगाइएको कारबाही फुकुवा गरिएको थियो ।

माधव पक्षले तत्कालिन सर्वोच्चको आदेशअनुसार २०७५ जेठ २ को अवस्थामा पार्टी फर्कनुपर्ने र सर्वोच्चको फैसला पछि गरिएका निर्णयहरु खारेज हुनुपर्ने माग अघि सारेको छ ।

बताइएअनुसार ४ बजेसम्म माग पुरा नभए माधव पक्षका सांसदहरुले सामूहिक राजीनामा दिनेछन् ।

‘हामीमाथिको कारबाही फुकुवा गर्नेभन्दा पार्टीलाई २०७५ जेठ ३ को अवस्थामा फर्काउने प्रतिबद्धता ठूृलो कुरा हो’, नेता भीम रावलले भनेका छन्, ‘स्थायी समिति बैठकको निर्णयअनुसार पार्टी एकताका लागि यही विषयमा अन्तिम प्रयास गरौं भनेको हो ।’