हामी सबैकाे संसारन्यूज

१.
दुखाईरहने छ आदत कसले बुझिदिन्छ
लागेको छैन कतै खत कसले बुझिदिन्छ
चोखो मायाँको परिणाम के के भोग्दैछु म
पर्गेल्ने छैन अदालत कसले बुझिदिन्छ ।
२.
बाटै भरी आँखा हुन्छन् कसरी म धाउनु भन
तिमी उता छौ म यता छु कसरी रमाउनु भन
घरि छेक्छ गरिवीले घरी तगारो जातको छ
चोखो मायाँ छ संकटमा कसरी निदाउनु भन ।
३.
शव्दहरु सकेसम्म रहोस् कम अनि पो मुक्तक
पढ्ने,सुन्नेलाई लागोस् मनोरम अनि पो मुक्तक
गुथिउन भावहरु बान्की परेको फूलको माला झैँ
चारै पङ्क्तिमा वाह होस् दम अनि पो मुक्तक ।
४.
मन हाँस्दा अनि रुँदा धेरै फरक पर्छ
र भावनाले मुटु छुँदा धेरै फरक पर्छ
भन्नेले भनिदिन्छन् केहि होईन मायाँ
तर मलाई तिमी नहुँदा धेरै फरक पर्छ ।

५.
जहिलेसुकै बाङ्गाटिगा कुरा चलाउनेले
जालझेल पनि पुराका पुरा चलाउनेले
परिवार ,समाज अनि देशै पो खानेभए
लुकीछिपी पछाडिबाट छुरा चलाउनेले