हामी सबैकाे संसारन्यूज

४ जेठ, काठमाडौँ । वाग्मती र लुम्बिनी प्रदेशमा हुने राष्ट्रियसभा चुनावमा सहभागी हुने मतदातालले ७२ घण्टाभित्रको कोरोनाको पीसीआर रिपोर्ट अनिवार्य देखाउनुपर्ने भएको छ ।

जेठ ६ गते वाग्मती प्रदेशमा र जेठ १७ गते लुम्बिनी प्रदेशमा हुने राष्ट्रियसभा चुनावमा सहभागी हुने मतदातालाई ७२ घण्टाभित्रको पीसीआर रिपोर्ट देखाउनुपर्ने भएको हो ।

पिसिआर रिपोर्ट अनुसार कोभिड संक्रमित नदेखिएका प्रदेशसभा सदस्यलाई मतदान केन्द्र ‘क’ मा, पालिकाका प्रमुख, उपप्रमुख, अध्यक्ष र उपाध्यक्षलाई मतदान केन्द्र ‘ख’ मा र कोरोना सङ्क्रमण देखिएकालाई मतदान केन्द्र ‘ग’ मा मतदान गर्ने व्यवस्था मिलाउन निर्वाचन आयोगले निर्देशन दिएको छ ।

आयोगले कोभिड १९ महामारीको विद्यमान अवस्थामा सुरक्षा मापदण्डको पूर्ण रुपमा पालना गर्न गराउन आवश्यक व्यस्था गर्नुपर्ने भएकाले राष्ट्रिय सभा सदस्य उपनिर्वाचिनलाई व्यवस्थित एवम् सुरक्षित रुपमा सम्पन्न गर्न १६ बुँदे ‘राष्ट्रिय सभा सदस्य उपनिर्वाचन स्वास्थ्य सुरक्षा मापदण्ड २०७८’ सम्बन्धी विशेष व्यवस्था गरिएको आयोगका प्रवक्ता राजकुमार श्रेष्ठले जानकारी दिए ।