हामी सबैकाे संसारन्यूज

जेठ ४, काठमाडौं । जनता समाजवादी पार्टी (जसपा)मा देखिएको विवाद तत्कालका लागि समाधान भएको छ । जसपाका दुई अध्यक्षबीच सहमती भएसँगै यस्तो देखिएको हो ।

दुई अध्यक्ष महन्थ ठाकुर र उपेन्द्र यादवबीच पार्टी विवाद समाधान गर्न ८ बुँदे सहमती भएको छ । पार्टीभित्रको आन्तरिक संगठन व्यवस्थापनदेखि सरकारमा जाने वा नजाने विषयमा समेत दुई पक्षबीच सहमती भएको हो ।

८ बुँदे सहमतीअनुसार हालसम्मका विवाद पार्टीको विधि तथा विधानअनुसार खोज्ने सहमती भएको छ । साथै सरकारका विषयमा देखिएको विवादमाथि पनि पार्टीभित्र छलफल गरेर निर्णय लिने सहमती भएको छ ।

आफ्नै नेतृत्वमा सरकार बन्ने अवसर आए नछाड्ने

दुई पक्षबीच तत्काल अन्यको नेतृत्वको बनेको सरकारमा सहभागी नहुने सहमती भएको छ । साथै दुई पक्षबीच प्रतिपक्षमा बस्ने पनि सहमती भएको छ ।

साथै दुई पक्षले आफ्नै नेतृत्वमा सरकार बनाउने अवसर आएको खण्डमा नछाड्ने पनि सहमती भएको छ ।

‘तत्काल हाम्रो पार्टी सरकारमा सहभागी हुने छैन्, जनता समाजवादी पार्टि नेपाल सरकारमा सहभागी नभई प्रतिपक्षमा नै रही आफ्नो भूमिका निर्वाह गर्ने पार्टीको नीति र निर्णय यथावत कायम रहने छ’, संयुक्त विज्ञप्तीमा भनिएको छ, ‘तर राष्ट्रिय सहमति वा आफ्नै पार्टीको नेतृत्वमा सरकार बन्ने अवसर प्राप्त हुन सक्ने अवस्था भएमा सरकार गठन गर्न अगाडि बढ्न सकिनेछ ।’