हामी सबैकाे संसारन्यूज

विश्ववयपी रुपमा छाएको कोरोना महामारीको पहिलो लहरमा कोरोना संक्रमितलाई समाजमा छिःछि र दुर–दूर गर्दा धेरैले मानसिक रुपमा पीडा भोग्ने मात्र नभई केहीले आइसोलेशनमै, केहीले घर फर्किएपछि र केहीले अस्पतालमै आत्महत्या गरेका घटना पनि हामीले सुन्यौ अनि भोग्यौ पनि । तर, कोरोनाको दोस्रो लहरले भयावह रुप लिए पनि पहिलो लहरमा जस्तो छिःछि र दुर–दूर हुने अवस्था भने आएन । धेरैले आफ्नै घरमा बसेर, घर परिवारको सहयोगमा कोरोना संक्रमणलाई जितेर पुनः स्वस्थ्य जीवनमा फर्किए । अहिले पनि ८० हजार भन्दा बढी कोरोना संक्रमितले होम आइसोलशनमै बसेर परिवार र समाजको साथ र सहयोगमा कोरोनालाई जित्नका लागि आत्मबल बढाइरहेका छन् ।

कोरोना संक्रमितलाई निको बनाउन परिवारको अहं भूमिका
कोरोना संक्रमित भएका आफ्ना परिवारका सदस्यलाई छिट्टै संक्रमणबाट मुक्त बनाउन परिवारका अन्य सदस्यको अहं भूमिका हुन्छ । खानपान लगायतका स्वास्थ्य अवस्थामा ध्यान दिनुका साथै संक्रमित सदस्यको मनोबल उच्च कनाउनका लागि पनि परिवारका सदस्यको ठूलो भूमिका हुन्छ । परिवारका सदस्यले दिएको हौसला र आत्मबलकै कारण कोरोना संक्रमित छिटो संक्रमण मुक्त हुन्छन र पुरानै लयमा जीवनको गति अगाडि बढाउन सफल हुन्छन् ।

परिवारका सदस्यले गर्नुपर्ने यी पाँच काम
१-घर परिवारमा यदि कसैलाई कोरोना संक्रमण भएको शंका लागेमा तत्काल कोरोना परीक्षण गराउने ।

२–संक्रमितलाई छुट्टै कोठामा राख्ने । पौष्टिक खानेकुरा खुवाउने, आराम गर्न लगाउने तथा संक्रमितले प्रयोग गरेका समानहरु अलग्गै राख्ने र सरसफाईमा बिशेष ध्यान दिने ।

३–पल्स अक्सिमिटरले संक्रमितको शरीरको अक्सिजनको स्तर जाँच गरौं । साथै शरीरको अक्सिजनको स्तर बढाउन संक्रमितलाई घोप्टो परेर सुत्न लगाउने । ज्वरो आएमा प्यारासिटामोल खुवाउने र पानी पट्टि लगाइदिने । ४–५ दिनसम्म पनि ज्वरो कम नभएमा स्वास्थ्यकर्मीसँग तत्काल परामर्श गर्ने ।

४–नजिकको अस्पताल वा स्वास्थ्यकर्मीसँग फोन मार्फत् निरन्तर सम्पर्कमा रहने । उनीहरुको सल्लाह बमोजिम संक्रमितको अवस्था हेरि समयमा नै अस्पताल लैजाने व्यवस्था गर्ने । ज्वरो नघटेमा, खोकी ठिक नभएमा, शरीमा अक्सिजनको मात्रा कम भई अप्ठ्यारो महसुस भएमा, संक्रमित स्वयम्ले आफ्नो हेरचाह गर्न नसक्ने देखिएमा वा बोली लरबरिन थालेमा तुरुन्त अस्पताल लैजाने ।

५ एक व्यक्तिले मात्र संक्रमितको हेरचाह गर्ने । परिवारका अन्य सदस्यलाई पनि कोभिड–१९ का लक्षणहरु देखिन सक्ने भएकोले सर्तक रहने तथा संक्रमित परिवारका अन्य सदस्यको मानसिक स्वास्थ्यको विशेष ख्याल राख्न पनि स्वास्थ्य तथा जनसंख्या मन्त्रालयद्धारा दिइएको स्वास्थ्य सचेतनामा जानकारी दिइएको छ ।