व्यथा हजारौं बगे नयनमा बगर भएको छ जिन्दगानी ।
त्यसै कलेटी परेर फुस्रो अधर भएको छ जिन्दगानी ।
गरी इशारा समीप आई नयन झुकाएर लाज मान्दै,
पुलुक्क हेर्दा त्यसै अनौठो सफर भएको छ जिन्दगानी ।
मदन तिमी हौ भनेर आफैं मुना बनेको कथा सुनाई,
न प्रीत लायौ न साथ आयौ कसर भएको छ जिन्दगानी ।
सिनिक्क पार्दै लिपेर आँगन मलाइ डाक्ने उनी कता छिन्,
भनेर खोज्ने नशालु चञ्चल नजर भएको छ जिन्दगानी ।
सधैँ अँध्यारो रहन्न जीवन भनेर साँच्दै थिएँ उज्यालो,
निभेछ बत्ती उराठ लाग्दो शहर भएको छ जिन्दगानी ।
बहर-ए-बाफिर मुसम्मन महजुफ
१२१२२ १२१२२ १२१२२ १२१२२
वि.सं.२०७८ साउन २ शनिवार ०७:०१ मा प्रकाशित