हामी सबैकाे संसारन्यूज

४ साउन, काठमाडौं । नेकपा (एमाले) को केन्द्रीय कमिटीको बैठक आज बस्दै छ । च्यासलस्थित तुल्सिलाल प्रतिष्ठानमा बिहान ११ बजे बैठक बस्न लागेको हो ।

बैठकमा समसामयिक राजनीतिक विषय र पार्टीभित्रको आन्तरिक विवादका विषयमा छलफल हुने एमाले प्रवक्ता प्रदीप ज्ञवालीले जानकारी दिएका छन् । बैठक विधान महाधिवेशनमा बैठक केन्द्रित हुने बताइएको छ ।

उक्त बैठकले पार्टी निर्णयविपरीत ह्विप उल्लंघन गर्ने सांसदहरुमाथि कारवाही गर्ने बुझिएको छ । आइतबार बसेको स्थायी कमिटीले प्रधानमन्त्री शेरबहादुर देउवाको प्रस्तावको विपक्षमा मतदान गर्ने निर्णय गरेपनि एमालेका १२१ सांसद मध्ये ३३ जनाले पार्टीको निर्णयको उल्लंघन गरेका थिए । एमालेका २२ जना सांसदले प्रधानमन्त्री शेरबहादुर देउवाका पक्षमा मतदान गरेका थिए । त्यसमा अध्यक्ष केपी शर्मा ओली पक्षका ८ र वरिष्ठ नेता माधवकुमार नेपाल पक्षका १४ सांसदले देउवाका पक्षमा मतदान गरेका थिए । नेपाल समूहका १० जना अनुपस्थित रहे । सांसद भीम रावलले मतदान अघि नै राजिनामा दिएका थिए ।

माधव नेपाल समूहले नेपाली कांग्रेसका सभापति देउवालाई प्रधानमन्त्री बनाउन हस्ताक्षर बुझाएसँगै बढेको नेकपा विवाद पार्टी ह्विप विपरित देउवालाई विश्वासको मत दिएपछि झनै बढेको छ ।