हामी सबैकाे संसारन्यूज

६ साउन, काठमाडौँ । नेपाली कांग्रेसबाट प्रतिनिधिसभामा निर्वाचित सांसद् अमरेशकुमार सिंहले राजीनामा दिएका छन् ।

प्रधानमन्त्रीसमेत रहेका काँग्रेस सभापति तथा संसदीय दलका नेता शेरबहादुर देउवालाई उनले राजीनामा पत्र बुझाएका हुन् । पार्टीभित्रको विवादलाई लिएर सिंहले बुधबार सांसद पदबाट राजीनामा दिएका हुन् ।

‘महाधिवेशनको पूर्वसन्ध्यामा पार्टीको क्रियाशिल सदस्यता वितरण, समायोजना र नविकरणका क्रमा पार्टी भित्र उत्पन्न अवान्छित, अस्वभाविक र भद्धा प्रवृत्तिले नेपाली काँग्रेस चुस्त र गतिशिल बन्ने मार्गमा अवरोध पैदा गरेको’ पत्रमा उल्लेख छ । उनले बुझाएको राजीनामा पत्रमा उपसभापति विमलेन्द्र निधिको गतिविधिप्रति तिब्र आक्रोश पोखिएको छ ।

राजीनामा पत्रमा भनिएको छ ‘खास गरी प्रदेश नं २ मा उपसभापति विमलेन्द्र निधिले अवलम्बन गर्नुभएको नीति र व्यवहारले चिन्ताजनक स्थिति उत्पन्न गराएको छ । विगत दुई दशकदेखि प्रदेशमा काँग्रेसको एकछत्र नेताका रुपमा निधिको उपस्थ्तिि रहनु र यहि दुई दशकभित्र काँग्रेसको प्रभाव तथा हैसियत हसोन्मुख हुनुलाई संयोग मात्र मान्न सकिँदैन ।’

पार्टीलाई आफ्नो काबुमा राख्ने निहीत उद्देश्यबाट प्रेरित भई नेतृत्व तहकै जिम्मेवार नेताबाट गैरजिम्मेवार व्यवहार प्रस्तुत हुँदा आम निष्ठावान कार्यकर्तामा निराशा बढेको र यसले प्रदेशमा काँग्रेस पार्टीको स्थिति थप रक्षात्मक अवस्थामा पुग्ने खतरा पैदाभएको भन्दै यस्तो स्थितिमा पार्टीको एक जिम्मेवार सदस्यका रुपमा आफूले विशेष निर्णय लिनुपर्ने भएको बताएका छन् ।