हामी सबैकाे संसारन्यूज

९ अगस्त, लेगोस, नाइजेरिया । गैरआवासिय नेपाली सङ्घको आठौं साधारणसभाबाट नवनिर्वाचित कार्यसमितिको आइतवार सम्पन्न प्रथम बैठकले नेपाल र नाइजेरियामा परिपकारी कार्य गर्न एनआरएनए नाइजेरिया कल्याणकारी कोषको स्थापना गरि आर्थिक संकलन कार्यको बैठकबाटै थालनी गरेको छ ।

बैठकले यो कार्यकालमा ‘ एक एनसीसी एक परियोजना’ अन्तर्गत सातौ नेपाल प्रोजेक्ट समेत सम्पन्न गर्न एक समिती गठन समेत गरेको छ । यसअघि संघले कैलाली, खोटाङ, मकवानपुर, सुनसरी, रसुवा र चितवनका स्कुलहरुमा यो परियोजना अन्तर्गत स्कुलका छात्राबास, पुस्ताकालय, प्रयोगशाला र कक्षा भवनका लागि भवनहरु निर्माण गरिसकेको छ ।

संघले तत्काल मेलम्चीको बाढीका कारण पीडित भएकाहरुका लागि मानविय राहत सहयोग पठाउने समेत निर्णय गरेको छ ।

त्यस्तै लेगोसस्थित असहाय बालबालिका केन्द्रलाई सहयोग गर्ने र कोभिडले स्थगन भएको नियमित रक्तदान कार्यक्रमलाई पुन सुचारु गर्ने निर्णय गरेको छ ।

संघका नवनिर्वाचित अध्यक्ष बिरेन्द्र गुप्ताको अध्यक्षतामा सम्पन्न बैठकमा सस्थापक अध्यक्ष एब संरक्षक हिक्मत थापा, सल्लाहकार हिमा खडका, आइसीसी सदस्य बिश्वास पौडेल, उपाध्यक्ष अभिषेक मान सिंह र महासचिव सोमेश अर्यालले आ–आफ्ना धारणाहरु राखेका थिए ।