हामी सबैकाे संसारन्यूज

भदौ २५, काठमाडौं । १४ सांसदलाई पदमुक्तसहितका माग राख्दै एमालेका सांसदहरु निरन्तर नाराबाजीमा उत्रिईरहँदा एमालेकै तेस्रो धार भनिने भीम रावल नेतृत्वको समूह भने रमिते मात्रै देखिएको छ । शुक्रबार संसद बैठकमा भएको नाराबाजीमा तेस्रो धारका सांसदहरु भीम रावल, घनश्याम भुसाल, सुरेन्द्र पाण्डे, योगेश भट्टराईलगायत रमिते देखिएका थिए ।

एमालेका सांसदहरु नाराबाजी र रोष्टमतर्फ उक्लिने प्रयास गरिँरहँदा उनीहरु एक–आपसमा कानेखुसी गर्दै उभिएका थिए । बाध्यात्मक रुपमा नाराबाजीमा भट्याउन पुगेका उनीहरु अन्य सांसदहरु जस्तै आक्रामक देखिएनन् ।

लामो समय माधवकुमार नेपाल नेतृत्वको समूहमा देखिएका उनीहरु पार्टी विभाजनको अन्तिम समय एमाले तर्फ फर्किएका थिए । जसको प्रभाव स्वरुप पनि उनीहरु माधव पक्षविरुद्व नगएको देखिन्छ ।

यसअघि बुधबार बसेको संसद बैठकमा पनि उनीहरु निकै गाह्रो मानि–मानि विरोधमा देखिएका थिए । संसद बैठकपछि नेता योगेश भट्टराईले माधव नेपाल नेतृत्वको नेकपा (एकीकृत समाजवादी)की नेतृ रामकुमारी झाँक्रीसँग तस्बिर खिचाएको देखिएको थियो । जुन अहिले सामाजिक सञ्जालमा चर्चाको विषय पनि बनेको छ ।