हामी सबैकाे संसारन्यूज

१
यी आँखामा बसाउँछु भन्नु मात्र हो
सँधै भरि हसाउँछु भन्नु मात्र हो
कोहि शुन्दर देख्यो कि उतै भुल्नेले,
मर्दा आँशु खसाउँछु भन्नु मात्र हो ।

२
घरी घरी लाग्छ डर झुक्ने हो कि शीर ?
कसरी पो पार लाग्छ बिपत्ति र पिर ?
चारैतिर बाट दुर्दशाले घेर्यो एकैचोटी,
बुद्दीमान को निस्केला ? हटाउला आखिर ?

३
कतिसम्म गिर्ने भन्ने सिमा हुन्न रैछ
नसक्नेको पनि चाल धिमा हुन्न रैछ
बस्न पाएकै छैन उठाउन तयार छन्,
चटक्क छोडुँ, कुर्सीको बिमा हुन्न रैछ ।

४
देख्नासाथ ति आँखा फर्काउँछौ चिन्ता लाग्छ
अजंगले कस्तो औधी थर्काउँछौ चिन्ता लाग्छ
बुझेर पनि बुझिनसक्नुको छ तिम्रो हाउभाउ
मायाँमा पनि पो बहश चर्काउँछौ चिन्ता लाग्छ ।

५
मैंले अचेल पिउन थालेँ ढुक्क भए हुन्छ ।
मनको चोट सिउन थालेँ ढुक्क भए हुन्छ
आफ्नो सन्सार स्वर्ग पार्नु, रमाएर बस्नु,
तिमी बिना जिउन थालेँ ढुक्क भए हुन्छ ।