काठमाडौं । नेकपा (माओवादी केन्द्र)ले स्थायी समितिको बैठक बोलाएको छ। केन्द्रले बुधबार दिउँसो ३ बजे माओवादीको केन्द्रीय कार्यालय पेरिसडाँडामा बस्नेगरि बैठक बोलाएको स्थायी समिति सदस्य गणेश शाहले जानकारी दिए ।
शाहका अनुसार मन्त्रिपरिषद् विस्तारबारे छलफल गर्न बैठक बोलाइएको हो । आजको बैठकले सरकारमा सहभागी हुने मन्त्रीहरुको नाम टुंगो लगाउन सक्ने उनले बताए ।
गत असार २९ मा गठबन्धनको तर्फबाट सरकारको नेतृत्व सम्हालेका प्रधानमन्त्री शेरबहादुर देउवाले २ महिना बित्दासमेत मन्त्रिपरिषद्लाई पूर्णंता दिन सकेका छैनन् । मन्त्रिपरिषद्लाई पूर्णंता दिन नसक्दा उनको निकै आलोचना हुने गरेको छ ।
गठबन्धनको पछिल्ला बैठकहरुमा देउवाले सत्ता साझेदार दलहरुलाई मन्त्रीहरुको नाम दिन आग्रह गरिरहेको विषय बाहिरिएको थियो ।
वि.सं.२०७८ असोज ६ बुधवार १४:२७ मा प्रकाशित