काठमाडौं । जनताको बहुदलीय जनवाद (जबज)लाई आत्मसाथ गर्नुपर्ने सर्त राख्दै पार्टी प्रवेश नगरेका वामदेव गौतमलाई माधवकुमार नेपालले पार्टी प्रवेशको बाटो खुल्ला गरेका छन् । अध्यक्ष नेपालले जबजलाई आत्मसाथ गर्दै आफ्नो पार्टी अघि बढ्ने प्रतिबद्धता व्यक्त गरेका हुन् ।
पार्टी निकट युवा संघ नेपालले बिहीबार काठमाडौंमा आयोजना गरेको एक कार्यक्रममा उनले भने – जनताको बहुदलीय जनवादलाई हामीले आत्मासात गर्न चाहन्छौं । र त्यसको मूल्य र मान्यताको रक्षा गर्न चाहन्छौं । विश्वका विभिन्न देशहरुमा कम्युनिष्ट पार्टीहरुमा एकसे एक नेताहरुको उदय भएको छ । र उनीहरुको महत्वपूर्ण भूमिकाले त्यो देशको कम्युनिष्ट आन्दोलन निरन्तर रुपमा अगाडि बढेको छ ।
एमालेको सबै जिम्मेवारीबाट राजीनामा दिएको घोषणा गरेका वामदेव गौतम माधवको पार्टीमा जान जबजको सर्त राख्दै आएका थिए । उनले पदभन्दा सिद्धान्त मुख्य भएको बताउँदै आएका छन् ।
वि.सं.२०७८ असोज ७ बिहीवार १५:०१ मा प्रकाशित