काठमाडौँ । दशैं बिदा सकिएर अफिस खुलेको पहिलो दिन नै १२ जिल्लाका सिडिओको सरुवा गरिएको छ ।
गृहमन्त्री बालकृष्ण खाणले मन्त्री स्तरीय निर्णयबाट दसैँपछि कार्यालय लागेकै दिन आइतबार १२ जिल्लाका प्रमुख जिल्ला अधिकारी(प्रजिअ)सिडिओको सरुवा गरेका हुन् ।
मन्त्रालयले जनाए अनुसार गृहमन्त्रालयमा कार्यरत किरण थापा कैलाली सरूवा गरिएको छ भने कैलालीमा कार्यरत खगेन्द्र रिजाललाई गृह मन्त्रालय तानिएको छ ।
त्यस्तै जगन्नाथ पन्त मन्त्रालयबाट पाल्पा, हरि प्रसाद घिमिरे अर्घाखाँची, वेदनिधि खनाल सिन्धुपाल्चोक, माधव ढकाल बिपद जोखिम प्राधिकरण, राजु पौडेल स्याङ्जा, दीपक नेपालको मन्त्रालयमा सरुवा भएको छन् ।
कारागार व्यवस्थापन विभाग काठमाडौका वेदनिधी अधिकारीलाई डोल्पा, इलाका प्रशासन कार्यालय चन्द्रौटा, कपिलवस्तुबाट नेत्रप्रसाद शर्मालाई मुस्ताङ, जिप्रका मुस्ताङबाट श्रीनाथ पौडेललाई रोल्पा पठाइएको छ भने जिप्रका अर्घाखाँचीबाट विष्णु पौडेललाई गृहमन्त्रालय तानिएको छ ।
वि.सं.२०७८ कात्तिक १ सोमवार ०९:२३ मा प्रकाशित
