वालिङ्, स्यांग्जा । पर्वतका जयनारायण तिवारी र स्याङ्जाका शोभाखर ढकाल नेकपा (माओवादी केन्द्र) को केन्द्रिय सल्लाहाकार चयन भएका छन् ।
नेकपा (माओवादी केन्द्र )को मंगलबार सम्पन्न स्थायी कमिटिको निर्णयलाई उदृत गर्दै पर्वत र स्याङ्जाका माओवादी नेताहरुले मुख्यतः उनीहरु दुईजनालाई बधाइ दिइरहेका छन् ।
पर्वतमा तत्कालीन नेकपा चौमदेखि मशाल र माओवादीमा काम गर्दै आएका र जनयुद्धकालमा स्थायी शिक्षक छाडेर भूमिगत भएका तिवारी तत्कालीन तमुवान क्षेत्रमा जनप्रिय संगठकका रुपमा स्थापित थिए भने ढकाल तत्कालीन चौम हुदै स्याङ्जामा मशाल र माओवादीका संस्थापकका रुपमा आन्दोलनमा क्रियाशिल रहँदै आएका थिए ।
यसबाहेक तत्कालीन एमालेबाट माले हुदै जनयुद्धकालमै माओवादीको बिभिन्न जिम्मेवारी पुरा गरेका स्याङ्जा पिंडीखोलाका आर.बी तमु पनि सो पार्टीको सल्लाहाकार बनाइएका छन् । यसैगरी एमालेबाट सांसद समेत बनेर माओवादी आन्दोलनमा लागेका धु्रव लम्साल लेखा आयोगमा चयन गरीएका छन् ।
कम्युनिष्ट आन्दोलनको लामो उतार चढाव ब्यहोर्दै माओवादी आन्दोलनमा सक्रिय रहेका पर्वतका तुलसीगीरी तथा स्याङ्जाका गिरीधारी कोइराला र डिल्लीराम रिजाललाई सो पार्टीले जेष्ठ कम्युनिष्ट मंचमा राखेर सम्मान गरेको भन्दै बधाइ दिइएको छ ।
माओवादीले १४९ सदस्यीय सल्लाहाकार समिति तथा ९९ सदस्यीय जेष्ठ कम्युनिष्ट मंच बनाएको समाचार यसअघि सार्वजनिक भएको थियो ।
वि.सं.२०७८ कात्तिक ३ बुधवार १९:३४ मा प्रकाशित