काठमाडौं । सर्वोच्च अदालतमा आज (मंसिर १५) देखि गोला प्रक्रियाबाट पेशी व्यवस्थापन हुने भएको छ ।
प्रधानन्यायाधिश चोलेन्द्र शम्शेर जवराले आफुखुसी पेशी तोकेर न्यायलयलाई बदनाम गराउँदै आएको भन्दै लामो समयदेखि नेपाल बार एसोसियशनको नेतृत्वमा कानुन व्यवसायीहरु आन्दोलन गरेपछि गोलाप्रथाद्धार पेशी तोक्न जबरा राजी भएका थिए ।
आज बिहान १० बजे न्यायाधिशहरुले गोला प्रक्रियाद्धारा इजलास गठन गरेपछि मुद्दाको समुह बनेर सुनुवाईको प्रक्रिया सुरु हुने बताइएको छ । यो प्रक्रिया कार्यान्वयन आएसँगै प्रधानन्यायाधीशको एकलरुपमा मुद्दाको पेशी तोक्ने विशेषाधिकार अन्त्य हुनेछ ।
पेसी व्यवस्थापनसम्बन्धी कार्यविधि निर्देशिका २०७८ अनुसार प्रधानन्यायाधिश २१ न्यायाधिशले थैलीमा रहेको १ देखि २१ नम्बरका गोटीहरु बरिष्ठताका आधारमा पालैपालो उक्त थैलीबाट निकालेर बृहत पूण र पूर्ण इजलासहरु गठन गर्ने छन् । तर, कोरोना संक्रमणका कारण अस्पतालमा उपचार गराइरहेका प्रधानन्यायाधिश जबरा भने गोला प्रक्रियाबाट पेशी तोकिने पहिलो दिन सर्वोच्च अदालतमा उपस्थित हुन पाउने छैनन् ।
प्रधानन्यायाधिश जबराले न्यायालयभित्रको विकृति, विसंगति र भ्रष्टचारालाई प्रश्रय दिएको, आफुखुसी पेशी तोकेको लगायतका विषयलाई लिएर नेपाल बार एसोसियसनले प्रधानन्यायाधिशको राजीनामाको माग गर्दै लामो समयदेखि आन्दोलन गर्दै आएका थिए ।
नेपाल बार र नागरिक समाजको संयुक्त आयोजनामा गत बिहीवार (मंसिर ९ गत प्रधानन्यायाधिशको राजीनामाको माग गर्दै बालुवाटारस मार्चपास गरिएको थियो ।
वि.सं.२०७८ मंसिर १५ बुधवार ०९:१४ मा प्रकाशित