हामी सबैकाे संसारन्यूज

१५ चैत लिबाङ, रोल्पा । द्वन्द्वपीडित लक्षित विशेष कृषि कार्यक्रमका लागि जिल्लाका २२ जना कृषक छनोटमा परेका छन् ।

कृषकले निवेदन दिएका आधारमा छनोट गरिएको हो । जिल्लामा द्वन्द्वका कारण ज्यान गुमाएका परिवारबाट ३६ जना, अपाङ्ग परिवारबाट नौ, विस्थापित परिवारबाट १८ र स्थानीय शान्ति समितिको कार्यालयले सिफारिस गरेका दुई जनाले निवेदन दिएका थिए । स्वरोजगार सम्भावना, प्राविधिक उपयुक्तता, हालसम्म सेवा पाए नपाएको, आर्थिक अवस्था तथा निवेदक कृषकको द्वन्द्वप्रभावित अवस्थाको मूल्याङ्कनका आधारमा कृषकलाई छनोट गरिएको वरिष्ठ कृषि विकास अधिकृत लालकुमार श्रेष्ठले जानकारी दिनुभयो ।

यसरी छनोटमा परेका कृषकले कार्यालयबाट प्रतिव्यक्ति र ४० हजारका दरले अनुदान पाउनेछन् । ती कृषकले तरकारीखेती, प्लास्टिक घर र थोपा सिँचाइ अनिवार्य रुपमा गर्नुपर्ने छ । जग्गा भाडामा लिएर तरकारीखेती गर्न चाहने कृषकलाई सोही रकमबाट प्रतिव्यक्ति रु १५ हजारसम्म अनुदान दिइने बताइएको छ ।