काठमाडौं । काठमाडौंको भृकुटी मण्डपमा नाडा इभी एक्सपो सुरु भएको छ । बिहीबार भृकुटीमण्डपमा ईभी एक्सपो सुरु भएको हो ।
उक्त नाडा ईभी एक्सपोेमा विभिन्न प्रकारका चार पाङ्ग्रे, तीन पाङ्ग्रे तथा दुई पाङ्ग्रे सवारी साधनको प्रदर्शन गरिएको छ ।
नाडा इभी एक्सपोको उद्घाटन कार्यक्रमलाई सम्बोधन गर्दै नाडा अटोबाइल्स एसोशिएसनका अध्यक्ष ध्रुब थापाले अटोमोबाइल क्षेत्र राज्यलाई सबैभन्दा धेरै राजस्व बुझाउने क्षेत्र भएपनि सरकारले कडाइ गरेको गुनासो गरे । उनले अटो व्यवसायीहरुले गत आवमा मात्रै नेपालमा ९९ अर्ब बराबरको सवारी साधन आयात गरेको बताउँदै त्यसबाट राज्यलाई ९० अर्ब राजस्व प्राप्त भएको बताए ।
यस्तै,अध्यक्ष थापाले पछिल्लो ९ महिनामा २५ प्रतिशत व्यवसायी पलायन भएको र हजारौंले रोजगारी गुमाएको धारणा राख्दै सवारी साधनको आयात खुलाउन अर्थमन्त्रीसँग आग्रह गरे । उनले विद्युतीय गाडीहरुमा लाग्ने स्पेयर्स पार्ट्स र ब्याट्री नेपालमा नै उत्पादन गर्न सम्भव भएको बताउँदै थापाले त्यसका लागि १ प्रतिशत मात्रै भन्सार कर लगाउन आग्रह गरेका छन् ।
नाडाकाअनुसार पहिलो ईभी अटो शोमा ७ वटा चार पाङ्ग्रे ब्राण्डले भाग लिएका छन् । हुण्डाई, टाटा, बीवाईडी, महिन्द्रा, सीजी मोटर्स, ग्रेटवाल, निसान र टेस्लाले भाग लिएका छन् । आइतबारसम्म चल्ने एक्स्पोमा लगभग ४० हजार ग्राहकले अवलोकन गर्ने नाडाले जनाएको छ ।
वि.सं.२०७९ असोज ६ बिहीवार १३:३७ मा प्रकाशित