Sansar News
१९ चैत, मेलम्ची । सिन्धुपाल्चोक जिल्लाको सदरमुकाम चौतारामा भूकम्पसम्बन्धी जनचेतना कार्यक्रम शुक्रबार सम्पन्न भएको छ ।
जिल्ला दैवीप्रकोप उद्धार समितिको आयोजनामा चौताराको टुडिँखेलमा भूकम्प अभ्यास कार्यक्रम गरिएको हो । भूकम्प अघि र पछि जिल्लाका विभिन्न क्षेत्रमा काम गर्दै आएका गैरसरकारी संस्थाको आर्थिक सहयोगमा कार्यक्रम गरिएको हो ।
भूकम्पको आपत्कालीन अवस्थामा कसरी सुरक्षित रहने तथा त्यसपछिको अवस्थामा कस्तोे तरिकाले उद्धार तथा खोजी गर्न सकिन्छ भन्ने जनचेतना जगाउनका लागि कृत्रिम अभ्यास कार्यक्रम गरिएको जिल्ला दैवीप्रकोप उद्धार समिति अध्यक्ष तथा प्रजिअ अन्तरबहादुर सिलवालले बताउनुभयो ।
कार्यक्रममा जिल्लाका प्रमुख अड्डा पनि अस्थायी रुपमै टुडिँखेलमा खडा गरिएको थियो । घाइतेको उपचार सेवा, आगलागी नियन्त्रण गर्नाका साथै भूकम्पको समयमा आइपर्ने सम्पूर्ण घटनाको प्रस्तुति गरिएको थियो ।
वि.सं.२०७३ चैत १९ शनिवार ०२:५५ मा प्रकाशित
