काठमाडौं । निर्वाचन आयोगले स्याङ्जा क्षेत्र नम्बर २ र बाजुरामा पुनः मतदान नगर्ने निर्णय गरेको छ । मंसिर ४ गते भएको निर्वाचनको मतगणना थाल्न आयोगले निर्देशनसमेत दिएको छ ।
आयोगको बुधबार बसेको बैठकले स्याङ्जा–२ र बाजुरामा मतगणना सुरु गर्न सम्बन्धित निर्वाचन आधिकृतको कार्यालयहरुलाई निर्देशन दिएको हो । आयोगले मंसिर ४ गते भएको निर्वाचनलाई नै सदर गर्दै मतगणना सुरु गर्न भनेको हो ।
बैठकको निर्णयबारे निर्वाचन आयोगका आयुक्त ईश्वरीप्रसाद पौडेलले भनेका छन्, “बाजुरा र स्याङ्जा २ मा मतगणना गर्ने भनेर सर्वसम्मत निर्णय भएको छ।”
स्याङजा–२को चापाकोट नगरपालिकाको चार वटा मतदान केन्द्रमा नेपाली कांग्रेसले बुथ कब्जा गरेको भन्दै एमालेसहित अन्य राजनीतिक दलहरुले पुनः मतदानको माग गरेका थिए । त्यसैगरी, बाजुराको विभिन्न मतदान केन्द्रमा समेत बुथ कब्जा भएको भन्दै एमालेले पुन मतदान गर्नुपर्ने निवेदन दिएको थियो ।
वि.सं.२०७९ मंसिर १४ बुधवार १४:५२ मा प्रकाशित