काठमाडौं । राष्ट्रिय आविस्कार केन्द्रका प्रमुख महाविर पुनले ४ बुँदामा बीरगन्ज कृषि औजार कारखानाको आगामी कार्ययोजनाका बारेमा उल्लेख गरेका छन् ।
तीन महिना अघि सरकारले केन्द्रलाई कृषि औजार कारखाना संचालनका लागि जिम्मा दिएपछि पुनको टिमले कारखानाको काम अगाडि बढाएको थियो ।
पहिलो चरणमा कारखानाको सरसफाई र कवाडीहरु छुट्याउने र बिभिन्न मशीनहरु जांच गर्ने काम हुनुका साथै कारखानाको बिस्तृत सर्भे गरि यसलाई मर्मत गरेर संचालानमा ल्याउन लाग्ने मोटामोटी २५ करोड रुपैयाँ खर्चको लागत निकालेर नेपाल सरकारलाई बुझाएको जानकारी दिएका छन् ।
पुनका अनुसार यस्ता छन् आगामी योजना
१ कारखाना भित्र रहेको केहि महत्वपूर्ण मशीनहरु जस्तै डाई प्रेस मशीन, मिलिंग मशीन, लेथ मशीन, पंचिंग मशीन, ड्रिल मशीन र फर्नेसहरु मर्मत गरेर काम गर्ने बनाउने ।
२. पहिले नै यहाँ बनाईसकेको पाँचवटा जति औजारहरुको डाई छन् । ति डाईहरु छानेर हरेक औजारको १५÷१५ पीस जति नमुना बनाउने र परीक्षण गर्ने ।
३. कारखानाको हाताभित्र ३० बर्षमा बढेका जंगल र झाडीहरु डोजर लगाएर सफा गर्ने र समतल बनाउने । त्यहाँ दुईवटा माछापोखरी पनि छन र ति माछा पोखरीलाई सफा गर्ने र माछा हाल्ने ।
४. कारखानामा कम्तिमा पनि ४ बिघा जति ठाउँ खाली नै छ । त्यो ठाउँमा ट्रयाक्टरले जोतेर यो बर्ष नै मकै, धान र तोरी लगाउने ।
५.अनि नेपाल सरकारबाट के कस्तो किसिमको सहयोगहरु आउँछ र कहिले आउँछ भनेर पर्खिने ।
‘कुरा नलुकाइकन भन्नु पर्दा यो कृषि औजार कारखानालाई पुनर्संचालनमा ल्याउने कुरालाई धेरैले असम्भब नै ठानेका छन् । हरेस खाने मान्छेले त यो काम आँट गर्दै गर्दैन । तर आविष्कार केन्द्रका हामी मुर्ख र गोकते काजीहरु चाहिने भन्दा बढी नै मुर्ख भएकोले यो काम आँट गरेको हो । यसमा सबै नेपालीहरुको साथ र आइडिया चाहिन्छ । आँट गरेर आउनेहरुलाई धन्यबाद ।’ पुनले सामाजिक संजालमा लेखेका छन् ।
वि.सं.२०७९ माघ १२ बिहीवार १६:३६ मा प्रकाशित