काठमाडौं । नेपालीहरु दिनानु दिन सौखिन हुँदै गरेको पाइएको छ । भन्सार विभागले प्रकाशित गरेको गत पुस महिनासम्मको तथ्यांकलाई विश्लेषण गर्दा यस्तो देखिएको हो ।
विभागले प्रकाशित गरेको तथ्याङ्कअनुसार चालु आर्थिक वर्षको पुस मसान्तसम्म करिब सात खर्ब ९२ अर्ब ६६ करोड मूल्य बराबरको वस्तु तथा सेवाको आयात भएको छ भने यस अवधिमा जम्मा ८० अर्ब ८० करोड बराबरको वस्तु तथा सेवाको मात्र निर्यात भएको छ । यसरी हेर्दा, छ महिनाको अबधिमा करिब सात खर्ब ११ अर्ब ९० करोड व्यापारघाटा भएको छ ।
यो रकम विदेशमा श्रम गर्न गएका नेपालीहरुले पठाएको रेमिट्यान्स रकमभन्दा झण्डै एक खर्ब २६ अर्ब १० करोड रुपैंयाँले बढी हो । चालु आर्थिक वर्षको पुस मसान्तसम्म नेपालीहरुले पठाएको रेमिट्यान्स पाँच खर्ब ८५ अर्ब ८ करोड रुपैंयाँ रहेको नेपाल राष्ट्र बैंकले जनाएको छ ।
एक सय ३९ देशबाट आयात
नेपालीहरुले संसारका एक सय ३९ देशबाट वस्तु तथा सेवाको आयात गर्ने गरेका छन् । त्यस्तै, नेपालले ११८ देशमा निर्यात गर्ने गरेको छ ।
नेपालीहरुले दक्षिण एसियाको सानो पहाडी देश भुटानबाट समेत प्रशस्तै वस्तुहरुको आयात गरेका छन् । यो अबधिमा नेपालले भुटानबाट ५६ करोड २७ लाख रुपैंयाँको वस्तु तथा सेवाको आयात गरेको छ भने त्यसको करिब आधा २३ करोड ३३ लाखको निर्यात गरेको छ ।
त्यस्तै, दक्षिण अमेरिकी देश अर्जेन्टिनाबाट नेपालले करिब १६ अर्ब ५९ करोड रुपैंयाँ बराबरको वस्तु तथा सेवाको आयात गर्दा अर्जेन्टिनातर्र्फ मात्रै १० लाख बराबरको वस्तु तथा सेवाको निर्यात गरेको छ ।
युद्धग्रस्त देश युक्रेनबाट अरबौंको आयात
अहिले रुस र युक्रेनबीच युद्ध जारी छ । युक्रेन निकै समस्या छ । तथापी यस्तो अवस्थामा पनि नेपालले युक्रेनबाट निकै ठूलो परिणाममा वस्तु तथा सेवाको आयात गरेको छ ।
छ महिनाको अवधिमा नेपालले युद्धग्रस्त देश युक्रेनबाट करिब सात अर्ब ७२ करोड ८५ लाख मूल्यको समान आयात गरेको छ । यो अबधिमा नेपालले युक्रेनबाट सजावटका सामान, औद्योगिक कच्चापदार्थ, प्रिन्टिङ् मेसिनका पार्टपुर्जा, टोनर, स्मार्ट फोन गाडिका पार्टपुर्जा, सिरिन्ज तथा सर्जिकल सामाग्रिहरु भटमास, सूर्यमुखि तेललगायतका सामाग्री आयात गरेको छ ।
नेपालले विगत छ महिनाको अवधिमा सबैभन्दा धेरै वस्तु तथा सेवाको आयात भने भारतबाट गरेको छ । नेपालले भारतबाट करिब चार खर्ब ८६ अर्ब रुपैंयाँ बराबरको वस्तु तथा सेवाको आयात गरेको छ भने करिब ५७ अर्ब ८४ करोड बराबरको वस्तु तथा सेवाको निर्यात गरेको छ । नेपालले निर्यात गरेको वस्तु तथा सेवाको ठूलो हिस्सा भारतमा नै भएको देखिन्छ ।
