हामी सबैकाे संसारन्यूज

काठमाडौं । सेयर बजार मंगलबार राताम्मै भएर छ । मंगलबार नेप्से परिसूचक १६.४० अंकले घटेर २१०५ विन्दुमा पुगेको छ । यसअघि आइतबार सेयर बजार ६०.८८ अंकले घटेको थियाे ।

मंगलबार निर्माण र प्रशोधनमा उपसमूहबाहेक सबै समूहकाे सेयर मूल्य घटेर बजार राताम्मै भएकाे छ । निर्माण र प्रशोधनमा भने झिनो प्रतिशतले वृद्धि भएको छ ।

यसअघि साताको पहिलो कारोबार दिन पनि सेयर बजारमा भारी गिरावट आएको थियो । आइतबार ६०.८८ अंकले बजार घटेको थियो ।

मंगलबार २५५ कम्पनीको ४६ लाख ८५ हजार ८०९ कित्ता सेयरको कारोबार हुँदा एक अर्ब ७८ करोड रुपैयाँभन्दा बढी रुपैयाँको भएको छ । सबैभन्दा धेरै हिमालय डिस्टिलरी कम्पनीको ७ करोड ७५ लाख रुपैयाँको सेयर किनबेच भएको हो।

मंगलबार युनिलिभर नेपाल लिमिटेडको शेयर ६ प्रतिशतले, राप्ती हाइड्रो एन्ड जनरल कन्स्ट्रक्सन कम्पनीको ५ प्रतिशतले बढेको छ।