हामी सबैकाे संसारन्यूज

काठमाडौं । वाणिज्य बैंकहरु तोकिएको सिडी रेसियो (कर्जा/निक्षेप अनुपात) को नजिक देखिएका छन् ।

केन्द्रीय बैंकले चालु आर्थिक वर्षको मौद्रिक नीतिमार्फत यसअघिको ८५ प्रतिशतको कर्जा/निक्षेप\पुँजी अनुपात (सिडिसी रेसियो) लाई खारेज गर्दै ९० प्रतिशतको सिडी रेसियो तोकेको थियो ।

सोही व्यवस्था बमोजिम माघ मसान्तसम्म वाणिज्य बैंकहरुको औसत सिडी रेसियो ८६.३९ प्रतिशत पुगेको छ ।
आर्थिक वर्षको शुरुवाती महिना, साउनमा बैंकहरुले यस्तो सिडी रेसियो अधिकतम ८८.०७ प्रतिशत कायम गरेका थिए । चालु आर्थिक वर्षको पहिलो त्रैमास (असोज मसान्त) सम्ममा ८८ प्रतिशतमा झरेको सिडी रेसियो मंसिरमा ८६.४० प्रतिशत र पुस मसान्तमा ८६.१४ प्रतिशतमा झरेको नेपाल बैंकर्स संघले जनाएको छ ।

तथापि, पछिल्लो पटक माघ मसान्तमा पुनः सिडी रेसियो बढेर ८६.३९ प्रतिशत पुगेको संघले जनाएको छ ।

राष्ट्र बैंकको नियम अनुसार बैंकहरुले एक सय रुपैयाँ निक्षेप संकलन गर्दैगर्दा ९० रुपैयाँ कर्जा लगानी गरेर १० रुपैयाँ तरलता व्यवस्थापन गर्नुपर्ने हुन्छ । तर, पछिल्लो सिडी रेसियोलाई हेर्दा बैंकहरुले एक सय रुपैयाँ निक्षेपमा ८६ रुपैयाँ ३९ पैसा कर्जा लगानी गरेर १३ रुपैयाँ ६१ पैसा तरलता होल्ड गरेको देखिन्छ ।