हामी सबैकाे संसारन्यूज

काठमाडौं । क्यानडा र कम्बोडिया पठाइदिन्छु भनेर रकम ठगी गर्ने दुईजना पक्राउ परेका छन् ।
क्यानडा र कम्बोडिया पठाइदिन्छु भनेर २९ लाख बढी रकम ठगी गरेको आरोपमा सर्लाहीका लक्षमण थापा र दैलेखको तोपेन्द्र बहादुर सिंहलाई प्रहरीले पक्राउ गरेको हो ।

सर्लाही लालबन्दी नगरपालिका–३ हाल काठमाडौं बस्ने २९ वर्षीय थापाले क्यानडा पठाइदिन्छु भनेर १९ लाख ९० हजार रुपैयाँ ठगी गरेको अभियोगमा प्रहरीले बिहीबार दिउँसो प्रहरीले पक्राउ गरेको हो ।

थापाले पीडितसँग प्रति महिना तीन लाख आम्दानी हुनेगरी रोजगारीका लागि क्यानडा पठाइदिन्छु भन्दै पटकपटक गरी उक्त रूपैयाँ ठगी गरेको प्रहरीले जनाएको छ ।

त्यस्तै प्रहरीले कम्बोडियामा क्यासिनो क्षेत्रमा मासिक १ लाख ३० हजार तलब हुने गरी रोजगारीमा लगाइदिन्छु भनेर विभिन्न व्यक्तिबाट १२ लाख रुपैयाँ ठगी गरेको आरोपमा दैलेख भगवतीमाई गाउँपालिका–२, हाल काठमाडौं नयाँ बसपार्क बस्ने २३ वर्षीय तोपेन्द्र सिंहलाई पनि पक्राउ गरेको छ ।

सिंहले कम्बोडियाको क्यासिनोमा सेक्युरिटी गार्डको काम लगाई दिने प्रलोभनमा पारी पीडितहरूबाट पटक–पटक गरी उक्त रुपैयाँ ठगी गरेको प्रहरीले जनाएको छ । उनीहरु दुवैजनाका बारेमा थप अनुसन्धान गरिरहेको प्रहरीले जनाएको छ ।