हामी सबैकाे संसारन्यूज

काठमाडौं । प्रजातन्त्र दिवसको अवसरमा राष्ट्रपति विद्यादेवी भण्डारीबाट आम माफी पाएका सांसद अरुण चौधरी रिहा भएका छन् ।
कैलाली निर्वाचन क्षेत्र नम्बर २ बाट नागरिक उन्मुक्ति पार्टीबाट निर्वाचित सांसद चौधरी आइतबार बिहान कैलालीको कारागारबाट रिहा भएका हुन् । उनलाई पार्टीकी अध्यक्ष तथा सांसद रन्जीता श्रेष्ठ लगायतले स्वागत गरेका थिए ।

रिहा भए लगत्तै पत्रकारहरुसँग कुरा गर्दै सांसद चौधरीले राजनीतिक प्रतिशोधका कारण आफु पक्राउ परेको बताएका थिए ।

१३ वर्ष अगाडी आगजनी गरेको मुद्दामा दोषी ठहर भएका चौधरी प्रतिनिधि सभा सदस्यमा निर्वाचित भएपछि गत माघ बांकेबाट १९ गते पक्राउ परेका थिए ।

२०६६ भदौ ३ गते बन्दको अवज्ञा गर्दै ट्याक्टर जलाएको आरोपमा जिल्ला अदालत कैलालीले २०७० बैशाख ९ गते ६ महिना कैद सजाय र ८ लाख १९ हजार रुपैयाँ जरिवाना गर्ने फैसला गरेको थियो । तर चौधरी फरार रहेका थिए ।