हामी सबैकाे संसारन्यूज

काठमाडौं । राष्ट्रपति चयनको विषयमा छलफल गर्न नेकपा (माओवादी केन्द्र)ले पदाधिकारी बैठक बोलाएको छ । माओवादी केन्द्रका नेता गणेश शाहले जानकारी दिएअनुसार पार्टी केन्द्रीय कार्यालय पेरिसडाँडामा दिउँसो ४ बजेका लागि बैठक बोलाएको छ ।

शाहले जानकारी दिएअनुसार बैठकमा राष्ट्रपति चयनलगायतका विषयमा छलफल हुनेछ । बैठकमा प्रधानमन्त्रीसमेत रहेका माओवादी केन्द्रका अध्यक्ष पुष्पकमल दाहाल प्रचण्डले राष्ट्रपतिको उम्मेदवार सन्दर्भमा हालसम्मका छलफलबारे बिफ्रिङ्ग गर्नेछन् । जसका बारे बैठकले निर्णय लिने उनले जनाए ।

माओवादी केन्द्रले राष्ट्रिय सहमतिमा राष्ट्रपतिको उम्मेदवार चयन प्रस्ताव गरेको छ । जसबारे एमाले र नेपाली कांग्रेससहितका दलहरुसँग पनि निरन्तर छलफल गरिरहेको छ ।

गत बिहीबार प्रधानमन्त्री प्रचण्ड र एमाले अध्यक्ष केपी शर्मा ओलीबीच राष्ट्रपति चयनको विषयमा छलफल भएको थियो भने आइतबार साँझ कांग्रेसका शीर्ष नेताहरुसँग छलफल भएको थियो ।

माओवादीले पदाधिकारी बैठकमार्फत पछिल्ला छलफललाई आधार मानी निर्णय लिने शाहले बताए ।