हामी सबैकाे संसारन्यूज

काठमाडौं । नेकपा माओवादी केन्द्रको पदाधिकारी बैठकले राष्ट्रपति बारे निर्णय गर्ने अधिकार अध्यक्ष पुष्पकमल दाहाल ‘प्रचण्ड’ लाई दिएको छ ।

राष्ट्रपति बारे निर्णय गर्न पार्टी कार्यालय पेरिसडाँडामा सोमबार अपरान्ह बसेको सो पार्टीको पदाधिकारी बैठकले राष्ट्रपति बारे निर्णय गर्ने अधिकार अध्यक्ष प्रचण्डलाई दिएको हो ।

पार्टीका उपाध्यक्ष तथा प्रवक्ता कृष्ण बहादुर महराले बैठकमा पछिल्लो समयमा उत्पन्न राजनीतिक परिस्थितिबारे बैठकमा विश्लेषण भएको र राष्ट्रपतिमा राष्ट्रिय सहमति खोज्ने विषयमा छलफल भएको समेत बताएका छन् । प्रवक्ता महराका अनुसार यद्यपी राष्ट्रपतिमा यहि व्यक्ति भन्ने विषयमा भने छलपल भएन ।

महराले गणतन्त्रको रक्षा, संविधानको रक्षा र शान्ति प्रक्रिया पूरा गर्ने माओवादी केन्द्रको स्वार्थका लागि राष्ट्रपतिमा राष्ट्रिय सहमति खोज्ने निर्णय गरेको बताएका छन् ।

‘हाम्रो पार्टीको स्वार्थमा केन्द्रित भएर राष्ट्रिय सहमति खोजी गर्ने निर्णय भएको छ । गणतन्त्रको रक्षा, संविधानको रक्षा र शान्ति प्रक्रिया पूरा गर्ने यी तीनवटा नै हाम्रो मुख्य स्वार्थ हो,’ प्रवक्ता महराले भने, ‘तर्सथ अन्तिम निर्णय गर्ने जिम्मा प्रधानमन्त्री तथा पार्टीका अध्यक्षलाई दिइयो ।’

गत पुष १० गते सात राजनीतिक दलबीच भएको सहमतिमा सभामुख माओवादी र एमालेले आधा–आधा कार्यकाल चलाउने र राष्ट्रपति पूरै पाँचवर्ष एमालेले लिने भन्ने सहमति भएपनि पछिल्लो समय माओवादी केन्द्रले राष्ट्रपतिमा राष्ट्रिय सहमति खोज्ने अडान राख्दै आएको छ । उसले राष्ट्रपतिको उम्मेदवार तटस्थ भूमिका निर्वाह गर्न सक्ने र राष्ट्रिय सहमतिको व्यक्ति हुनुपर्ने माओवादी केन्द्रले बताउँदै आएको छ ।