हामी सबैकाे संसारन्यूज

काठमाडौं । राष्ट्रिय स्वतन्त्र पार्टीले सरकारलाई दिएको समर्थन कायमै राख्ने भएको छ ।

सोमबार बसेको सो पार्टीको बैठकले चितवन २ को उपनिर्वाचन लगायतका विषयमा छलफल तथा निर्णय गरेपनि सरकारलाई दिएको समर्थन फिर्ता लिनेबारे कुनै निर्णय गरेको छैन ।

बैठकले माघ २२ गते बसेको केन्द्रीय समितिको बैठकले गरेको निर्णयलाई यथावत राख्ने बताएको छ । सो पार्टीको २२ गते बसेको केन्द्रीय समितिको बैठकले सरकारबाट बाहिरिने निर्णय गर्दै समर्थन भने यथावत राख्ने निर्णय गरेको थियो ।
पुष १० गतेको बसेको सात दलीय गठबन्धनको बैठकले माओवादी केन्द्रका अध्यक्ष प्रचण्डलाई प्रधानमन्त्रीमा समर्थन गरेको थियो ।

सो गठबन्धनमा रहेको रास्वपाका सभापति तथा तत्कालीन गृहमन्त्री रवी लामिछाने नागरिकता विवादमा मुछिएपछि उनले दुवै पदबाट राजीनामा दिएका थिए । पार्टी सभापतिको राजीनामासँगै रास्वपाबाट बनेका अन्य तीन मन्त्रीले पनि माघ २३ गते प्रधानमन्त्रीलाई राजीनामा बुझाएका थिए ।