हामी सबैकाे संसारन्यूज

न्यूयोर्क । नेपाल आदिवासी जनजाति महासंघ अमेरिका (फिप्ना)को आयोजनामा “नेपालका प्रथम सहिद लखन थापामगरको १४६ औं स्मृति दिवस” मनाइएको छ ।

गत फेब्रेअरी १९ मा एक कार्यक्रमको आयोजना गरी प्रथम सहिद थापामगरको योगदानको सम्मान तथा स्मरण स्वरुप स्मृति दिवस मनाइएको हो ।

सो स्मृति दिवस कार्यक्रममा फिप्नााका सल्लाहकार, संघीय परिषदका सभामुख, उपसभामुख, पूर्वअध्यक्षहरू, न्यूयोर्क राज्यका लागि नेपाल सरकारको पर्यटन सदभावनादूत केशव राम राई र सदस्य संस्थाका अध्यक्ष एवं पदाधिकारीहरुको उपस्थिति रहेको थियो ।

फिप्नाकी महासचिव टोमा लामाले नेपालको प्रथम सहिद लखन थापामगरको योगदान स्मरण तथा चर्चा गर्नुको साथै सरकारले नेपालको प्रथम सहिद भनी घोषणा गरेपनि व्यवहारमा लागु नगरेकोमा दुःख व्यक्त गरिन् ।

पछिल्लो चरणमा नेपालमा त्यो वा यो को नाममा सहिदहरु थपिँदै गए पनि लखन थापा मगर जस्ता सच्चा सहिदहरुको उच्च मूल्यांकन नेपाल सरकारले नगरेको उनले बताइन् ।

फिप्नाका अध्यक्ष राज कुमार बिष्टको अध्यक्षतामा सम्पन्न कार्यक्रममा कोषाध्यक्ष तुल बहादुर तामाङले स्वागत मन्तव्य राखेका थिए भने उपस्थित् सबैले प्रथम सहिद थापामगरको योगदानलाई स्मरण गर्दै आ–आफ्नो मन्तव्य राखेका थिए ।

मन्तव्य राख्नेमा गुरुङ (तमु) सोसाइटी इंक अमेरिकाक अध्यक्ष तोरन गुरुङ, तामाङ सोसाईटी अफ अमेरिकाका अध्यक्ष छेमाङ तामाङ, मगर संघ अमेरिका अध्यक्ष कुलदीप रानामगर, जिरेल संघ अमेरिकाका अध्यक्ष शान्ति जिरेल, नेवा गुठीका अध्यक्ष विजयमान सिंह, थारुज एण्ड फ्रेण्ड एशाोसियसनका उपाध्यक्ष दीपक चौधरी, फिप्नाका सभामुख शुर्वण कुमार शाक्य, उपसभामुख गोमा योञ्जन, न्यूयोर्क राज्यका लागि नेपाल सरकारको पर्यटन सदभावनादूत केशव राम राई र फिप्नाका पूर्व सल्लाहकार तेञ्जिन उक्याव लगायतका थुप्रै व्यक्तित्वहरुले मन्तव्य राखेका थिए ।

मन्तव्यका क्रममा उनीहरुले क्रममा नेपाल सरकारले लखन थापामगरलाई नेपालको प्रथम सहिद भनी घोषणा गरेतापनि सोही हिसाबले मान्यता तथा जुन हिसाबले देशव्यापी रुपमा लखन थापागरको स्मृति दिवस मनाउनु पर्ने हो त्यो नभएकोमा दुःख व्यक्त गरेका थिए ।

उनीहरुले यस विषयमा सबैले आवाज उठाउनु पर्ने आवश्यक रहेको बताए । उनीहरुले जबसम्म देशव्यापी रुपमा प्रथम सहिद भनी स्मृति दिवस मनाइदैन तवसम्म सबैले दवाव दिनुपर्ने र जनमानसमा जानकारीको लागि आगामी दिनहरुमा अझ बृहत रुपमा स्मृति दिवस मनाउन जरुरी रहेको कुरा राखेका थिए ।

कार्यक्रममा सहिद थापामगरको सपनालाइै साकार बनाउन लाग्नुपर्ने भनाई राखेका थिए ।

कार्यक्रममा फिप्नाका सभामुख शुर्वण कुमार शाक्यले नेपाल सरकारले थापामगरलाई नेपालको प्रथम सहिद भनी घोषणा गर्ने तर प्रथम सहिदको दिवस चाहिँ नमनाउने व्यवहारमा किन नउतारेको भन्ने प्रश्न समेत गरेका थिए ।

अन्तमा कार्यक्रममा अध्यक्ष राजकुमार बिष्टले उपस्थित् सबैलाई धन्यबाद ज्ञापन गर्दै आउँदा दिनहरुमा पनि सहिद थापामगरको स्मृति दिवस अझ भव्यरुपमा मनाउने प्रयत्न गर्नुको साथै नेपाल सरकारलाई दबाव दिने तथा ध्यानाकर्षण गराउने बताए ।