हामी सबैकाे संसारन्यूज

काठमाडौं । राष्ट्रपति र उपराष्ट्रपति निर्वाचनका लागि आजदेखि आचारसंहिता लागू भएको छ ।

यहि फागुन २५ गते हुने राष्ट्रपति र चैत ३ गते हुने उपराष्ट्रपति निर्वाचनका लागि आजदेखि आचारसंहिता लागू भएको निर्वाचन आयोगले जनाएको छ ।

राष्ट्रपतिको निर्वाचनका लागि फागुन १३ गते उम्मेदवारीको मनोनयन दर्ता भइसकेको र १६ गते उम्मेदवारको अन्तिम नामावली प्रकाशन भइसकेको अवस्थामा राष्ट्रपति र उपराष्ट्रपति दुुवै पदको निर्वाचनका लागि निर्वाचन आयोग ऐन २०७३ को दफा २२ का अनुसार आजदेखि चैत ५ गतेसम्म कायम रहने गरी आचारसंहिता लागू भएको हो ।

राष्ट्रपति पदका लागि आठ दलीय गठबन्धनको समर्थनमा नेपाली कांग्रेसका वरिष्ठ नेता रामचन्द्र पौडेल र एमालेबाट पूर्वसभामुख सुवास नेम्वाङले प्रतिष्प्रर्धा गर्नेछन् ।

क–कसलाई लाग्छ त आचारसंहिता ?
आयोगका अनुसार आजदेखि लागू हुने आचारसंहिता नेपाल सरकार र मन्त्रीहरु, प्रदेश सरकार र मन्त्रीहरु, संघ, प्रदेश र स्थानीय तहका कर्मचारीहरु, सुरक्षा निकाय, सुरक्षाकर्मी तथा कर्मचारीहरु, सरकारी, अर्धसरकारी तथा सार्वजनिक संस्थाको कार्यालय तथा कर्मचारी, राजनीतिक दल तथा राजनीतिक दलको भातृ संगठन, उम्मेदवार तथा उम्मेदवारका प्रतिनिधि, राजनीतिक दल तथा उम्मेदवारको मतदान, एवं मतगणना प्रतिनिधि, सार्वजनिक पद धारण गरेको व्यक्ति, संचार प्रतिष्ठान, सोका कर्मचारी तथा संचारकर्मी र मतदातामा लागू हुनेछ ।
आयोगले सम्बन्धीत सबैमा आचारसंहिताको पालना गर्न र स्वतन्त्रतापूर्वक मतदान गर्न पाउने अधिकारको सम्मान गर्न तथा निर्वाचनको निष्पक्षतामा कही कतैबाट प्रश्न उठाउन नपाउने गरी काम गर्न समेत अपिल गरेको छ ।

राष्ट्रपति र उपराष्ट्रपतिको निर्वाचनका लागि संघीय संसदमा हाल कायम रहेका ३३२ र प्रदेश सभाका ५५० गरी कूल ८८२ मतदाता रहेका छन् ।