काठमाडौं । कोशी नामाकरणको विरोधमा रहेको समूह र प्रहरीबीच विराटनगरमा झडप भएको छ । कोशी प्रदेशको नामाकरणको विरोधमा लगातार प्रर्दशन गर्दै आइरहेको प्रदेश पुनः नामांकन संयुक्त संघर्ष समितिका कार्यकर्ता र प्रहरीबीच झडप भएको हो ।
पहिचान पक्षधर विभिन्न संघसंस्थाको संयुक्त समितिको प्रदर्शन नियन्त्रणका लागि प्रहरीले अश्रुग्यास र लाठीचार्ज गरेको छ । प्रदर्शनकारीले पनि प्रहरीतर्फ ढुंगा हानेका छन् ।
मंगलबार प्रदर्शनकारीले प्रदेश सांसद बसेको होटलमा ढुंगामुढा गरेका छन्। यस क्रममा होटलमा क्षति पुगेको छ।
विराटनगरको बिग होटेलमा सांसदहरूको दिगो विकास लक्ष्य प्राप्तिका लागि स्रोत व्यवस्थापनसम्बन्धी अन्तरक्रियात्मक कार्यशालामा सहभागी हुन सांसदहरू पुगेका थिए । कार्यक्रम शुरू भएको केही समयमै संघर्ष समितिका कार्यकर्ताहरू त्यही होटेलमा पुगेर घेराउ गरेका थिए ।
उक्त होटलअगाडि मुठभेडको स्थिति सिर्जना हुन नदिन यतिबेला कडा सुरक्षा व्यवस्था पारिएको छ। आन्दोलनकैबीच सांसदहरू होटलभित्र पसेका हुन्। अहिले उक्त क्षेत्रमा तनावग्रस्त छ । आन्दोलनकारीले होटल विगको कफी सपको सीसा पनि फुटाइदिएका छन् ।
