काठमाडौं । नेकपा एकीकृत समाजवादीका उपाध्यक्ष केदार न्यौपाने र स्थायी समिति सदस्य चूडामणि जंगलीले पार्टी परित्याग गरेका छन् ।
पार्टीले लिएको नीति र कार्यदिशाप्रति असहमति राख्दै नेताद्वयले दिएको राजीनामालाई मंगलबार बसेको सचिवालय बैठकले स्वीकृत गरेको प्रवक्ता जगन्नाथ खतिवडाले जानकारी दिए ।
दुबै जनाले मकवानपुरको एक कार्यक्रममा एमाले फर्किन थालेको भन्दै तस्वीर सार्वजनिक गरेका थिए । एमाले फर्कने तयारीका क्रममा नेताहरुसँग छलफल चलिरहेको स्रोतले जानकारी दिएको छ। उनले पछिल्ला दिनमा पार्टीभित्र एमालेसँग मिल्नु पर्ने अभिव्यक्ति दिँदै आएका थिए ।
उपाध्यक्ष न्यौपाने तत्कालीन एमाले–माओवादी केन्द्र एकतापछि बनेको नेकपामा पोलिटब्युरो सदस्य थिए । एमालेमा २०४५ सालदेखि केन्द्रीय सदस्यको भूमिका निर्वाह गर्दै आएका उनी एमाले विभाजनसँगै एकीकृत समाजवादीको उपाध्यक्ष बनेका थिए।
#Kedarneupane#chudamaniJungali#Lefttheparty
