हामी सबैकाे संसारन्यूज

काठमाडौं । सत्ता साझेदार दलहरूले मन्त्रालयको संख्यासँगै नाम पनि टुंग्याएका छन् । प्रधानमन्त्री पुष्पकमल दाहाल प्रचण्डको प्रस्तावअनुसार संख्यामा सहमत दलहरु मन्त्रालयको नाममा पनि सहमत बनेका हुन् ।

बुधबार बसेको सत्ता साझेदारको बैठकमा प्रधानमन्त्रीले दलहरुले पाउने मन्त्रालयको संख्या प्रस्ताव गरेका थिए । जसमा नेपाली कांग्रेसले आठ‚ नेकपा माओवादी केन्द्रले पाँच‚ एकीकृत समाजवादी पार्टीले दुई, जसपाले, लोसपा एक र अन्य एक पाउने प्रस्ताव थियो । जसअनुसार मन्त्रालयको नाम पनि टुंगो लागेको सत्ता गठबन्धनका नेताहरुले बताएका छन् ।

दलहरुबीच सहमति भएअनुसार गठबन्धनको ठूलो दल कांग्रेसले अर्थ, परराष्ट्र, रक्षा‚ सहरी विकास‚ भूमि व्यवस्था‚ सामान्य प्रशासन‚ स्वास्थ्य र कानुन मन्त्रालय मन्त्रालय पाउने भएको छ भने माओवादीले गृह‚ ऊर्जा‚ सञ्चार‚ पर्यटन र महिला तथा बालबालिका मन्त्रालयको जिम्मेवारी पाउने भएको हो ।

त्यस्तै, एकीकृत समाजवादीले भौतिक पूर्वाधार र वन मन्त्रालय पाउने भएको छ । नेपाल समाजवादी पार्टीले खानेपानी तथा सरसफाइ मन्त्रालय‚ जनमत पार्टीले उद्योग, वाणिज्य तथा आपूर्ति मन्त्रालय‚ नागरिक उन्मुक्ति पार्टीले युवा तथा खेलकुद र जनता समाजवादी पार्टी (जसपा)ले शिक्षा, विज्ञान तथा प्रविधि मन्त्रालय‚ कृषि तथा पशुपन्छी मन्त्रालय‚ लोकतान्त्रिक समाजवादी पार्टी (लोसपा)ले श्रम, रोजगार तथा सामाजिक सुरक्षा मन्त्रालय पाउने भएको छ ।

दलहरुबीच आजै मन्त्रिपरिषद् विस्तार गर्ने पनि तयारी भएको बुझिएको छ ।